وزیرِ اعظم مودی نے جے پرکاش نارائن کو خراج عقیدت پیش کی

نئی دہلی، 11 اکتوبر (یو این آئی) وزیرِ اعظم نریندر مودی نے لوک نائک جے پرکاش نارائن کو ان کے یومِ پیدائش پر خراجِ عقیدت پیش کرتے ہوئے انہیں جمہوریت اور سماجی انصاف کا مضبوط حامی قرار دیا اور کہا کہ وہ ملک کی سب سے بے باک آوازوں میں سے ایک تھے ۔
وزیرِ اعظم نے ہفتے کے روز سوشل میڈیا پلیٹ فارم ایکس پر اپنے پیغام میں لکھا کہ ہندوستان کی سب سے بے باک آوازوں میں سے ایک اور جمہوریت و سماجی انصاف کے مضبوط حامی لوک نائک جے پرکاش نارائن کو ان کے یوم پیدائش پر خراجِ عقیدت۔ انہوں نے اپنی زندگی عام شہریوں کو بااختیار بنانے اور آئینی اقدار کو مضبوط کرنے کے لیے وقف کر دی۔ ان کے ہمہ گیر انقلاب کے نعرے نے ایک ایسی عوامی تحریک کو جنم دیا، جو مساوات، اخلاقی اقدار اور اچھی حکمرانی پر مبنی ریاست کے قیام کی داعی تھی۔
وزیرِ اعظم نے جے پرکاش نارائن کی پائیدار وراثت کو یاد کرتے ہوئے کہا کہ انہوں نے خاص طور پر بہار اور گجرات میں کئی عوامی تحریکوں کی قیادت کی، جس کے نتیجے میں پورے ملک میں سماجی-سیاسی بیداری آئی۔ ان تحریکوں نے اس وقت کی مرکز میں برسرِ اقتدار کانگریس حکومت کو ہلا کر رکھ دیا، جس نے بعد میں ایمرجنسی نافذ کر کے آئین کو روند ڈالا۔
وزیرِ اعظم نے جے پرکاش نارائن کا ایک اقتباس بھی شیئر کیا، جس میں وہ کہتے ہیں کہ ہندوستانی جمہوریت کے تابوت میں ٹھوکی گئی ہر کیل، میرے دل میں ٹھونکی گئی کیل کے برابر ہے ۔