سابق رکن اسمبلی کے بیٹے سے شیئر مارکیٹ می سرمایہ کاری کے نام پر دھوکہ دہی

ہری دوار، 11 اکتوبر (یو این آئی) اتراکھنڈ کے ضلع ہری دوار میں شیئر مارکیٹ کے نام پر بڑے پیمانے پر دھوکہ دہی کا معاملہ سامنے آیا ہے ۔ سابق رکن اسمبلی حاجی ثروت کریم انصاری کے بیٹے عامر انصاری کو ایک جوڑے نے ماہانہ 20 فیصد منافع کا لالچ دے کر لاکھوں روپے ٹھگ لیے ہیں۔
پولیس نے متاثرہ کی شکایت پر جمعہ کے روز معاملہ درج کرکے تفتیش شروع کر دی ہے ۔
عامر انصاری نے بتایا کہ مارچ-اپریل 2025 میں ملزم امیت کمار گوتم، باشندہ موضع کھیڑکی، تھانہ پرکاجی، مظفرنگر، اور اُن کی بیوی وندنا اُن کے دفتر آئے تھے ، دونوں نے خود کو شیئر مارکیٹ میں سرمایہ کاری کا ماہر بتایا اور کہا کہ ان کی ایک پرائیویٹ لمیٹڈ کمپنی ہے ، جس کا ہیڈکوارٹر سرائے روز، جوالاپور، ہری دوار میں ہے ۔
ملزم جوڑا لگژری گاڑیوں میں گھومتا تھا اور مہنگے تحفے دے کر سرمایہ کاروں کو متاثر کرتا تھا۔ انہوں نے ماہانہ 20 فیصد منافع کا جھانسہ دے کر عامر انصاری اور ان کے دو ساتھیوں سے لاکھوں روپے سرمایہ کاری کے نام پر لے لیے تھے ۔
جب عامر انصاری اور ان کے ساتھیوں نے اپنی رقم واپس مانگی تو ملزمین نے پیسے دینے سے انکار کر دیا اور جان سے مارنے کی دھمکی دی۔ اس کے بعد متاثرہ نے تھانہ منگلور میں شکایت درج کرائی اور کارروائی کا مطالبہ کیا، جس کے بعد پولیس نے معاملہ درج کر لیا ہے ۔
تھانہ پولیس نے بتایا کہ معاملے کی تفتیش شروع کر دی گئی ہے اور دونوں ملزمین کے ٹھکانوں کے ساتھ ساتھ ان کے مبینہ سرمایہ کاری نیٹ ورک کی بھی جانچ کی جا رہی ہے ۔ ابتدائی تفتیش میں یہ امکان ظاہر کیا جا رہا ہے کہ ہو سکتا ہے کہ دیگر افراد کے ساتھ بھی اسی طرح کا فراڈ کیا گیا ہو۔