سرینگر/۱۱ ؍اکتوبر
جموںکشمیر کانگریس کی اعلیٰ قیادت اتوار کو یہاں ایک اہم اجلاس میں شریک ہوگی، جس میں پارٹی کی حکمتِ عملی راجیہ سبھا کی چار نشستوں اور دو اسمبلی حلقوں کی ضمنی انتخابات کے حوالے سے طے کی جائے گی۔
ذرائع کے مطابق، پردیش کانگریس کمیٹی کے صدر طارق حمید قرہ پارٹی ہیڈکوارٹر میں اجلاس کی صدارت کریں گے، جس میں کشمیر اور جموں، دونوں خطوں سے اہم رہنما شریک ہوں گے۔
ذرائع نے بتایا کہ کانگریس قائدین آئندہ راجیہ سبھا انتخابات کیلئے اپنی حکمتِ عملی کو حتمی شکل دیں گے۔ کانگریس نے چار میں سے ایک نشست پر حکومتی جماعت نیشنل کانفرنس سے تعاون کی درخواست کی تھی۔
نیشنل کانفرنس نے جمعہ کے روز راجیہ سبھا کی صرف تین نشستوں کے لیے اپنے امیدواروں کے ناموں کا اعلان کیا، اور کہا کہ ایک نشست کو فی الحال خالی رکھا گیا ہے کیونکہ کانگریس سے بات چیت جاری ہے۔
راجیہ سبھا انتخابات ۲۴؍ اکتوبر کو منعقد ہونے والے ہیں۔
کانگریس ذرائع کے مطابق، اجلاس میں پارٹی کی پالیسی پر بھی غور کیا جائے گا کہ بڈگام اور ناگروٹہ اسمبلی حلقوں کے ضمنی انتخابات میں، جن میں ووٹنگ نومبر میں ہوگی، پارٹی کیا موقف اختیار کرے۔
راجیہ سبھا الیکشن کے حوالے کانگریس اور اس کی اتحادی جماعت‘ نیشنل کانفرنس میں تعطل برقرار ہے۔ نیشنل کانفرنس نے چار میں سے ایسی تین نشستوں پر اپنے امیدواروں کا اعلان کیا ہے جن کے بارے میں کہا جارہا ہے کہ وہ محفوظ ہیں جبکہ چوتھی نشست‘ جس پر بی جے پی کا پلڑا بھاری ہے‘ کی پیشکش کانگریس کو کی ہے۔لیکن کانگریس تین ’محفوظ‘ نشستوں میں سے کوئی ایک نشست چاہتی ہے ۔
(ندائے مشرق خبر )
