غیر ملکی سیاحوں کو لے کر کاشی پہنچی مہاراجہ ایکسپریس

وارانسی 10 اکتوبر (یو این آئی)اترپردیش کے ضلع وارانسی میں جمعہ کو 62 غیر ملکی سیاحوں کو لے کر مہاراجہ ایکسپریس ٹرین پہنچی، جہاں اسٹیشن پر ان کا روایتی انداز میں تِلک، شہنائی، ڈھول نگاڑوں اور ویدک منتروں کے ساتھ شاندار استقبال کیا گیا۔
کووڈ وبا کے بعد یہ پہلا موقع ہے جب مہاراجہ ایکسپریس مکمل طور پر غیر ملکی سیاحوں سے بھری ہوئی ہے ، جس سے ہندوستان اور وارانسی کے سیاحت کے شعبے کو نئی رفتار ملنے کی امید ہے ۔
مرکزی وزارتِ سیاحت کے اسسٹنٹ ڈائریکٹر پاوس پرسون نے بتایا کہ حکومت ہند کے "دیکھو اپنا دیش” مہم کے تحت ملکی اور غیر ملکی سیاحوں میں ہندوستان کے تئیں دلچسپی تیزی سے بڑھ رہی ہے ۔ انہوں نے کہا کہ وارانسی ملک کے سب سے زیادہ پسند کیے جانے والے سیاحتی مقامات میں شامل ہے ۔
ہیڈ گائیڈ ابھیشیک سنگھ کے مطابق، کووڈ کے بعد پہلی بار مہاراجہ ایکسپریس مکمل طور پر 62 غیر ملکی سیاحوں کے ساتھ روانہ ہوئی ہے ۔ یہ ٹرین دنیا کی سب سے شاندار اور مہنگی لگژری ٹرینوں میں سے ایک ہے ، جس میں اعلیٰ طبقے کے سیاح سفر کرتے ہیں۔
انہوں نے بتایا کہ ٹرین دہلی، آگرہ، جے پور اور کھجوراہو سے ہوتی ہوئی وارانسی پہنچی ہے ۔ طے شدہ پروگرام کے مطابق، سیاح گنگا گھاٹ، سارناتھ اور دیگر اہم سیاحتی مقامات کا دورہ کریں گے اور بنارسی پکوانوں کا ذائقہ چکھیں گے ۔
سیاحوں میں تائیوان، اٹلی، امریکہ اور یورپ کے مختلف ممالک کے مسافر شامل ہیں۔