قانون ساز اسمبلی کا۹روزہ اجلاس۲۳؍اکتوبر سے شروع ہوگا

سرینگر/۹؍اکتوبر
جموں و کشمیر قانون ساز اسمبلی کا اجلاس۲۳؍اکتوبر سے سرینگر میں شروع ہوگا، جو۳۱؍اکتوبر تک جاری رہے گا۔
اسپیکر عبدالرحیم راتھر کی جانب سے جاری کردہ عارضی کیلنڈر کے مطابق یہ سیشن نو دنوں پر محیط ہوگا، جس میں مجموعی طور پر چھ ورکنگ دن کی کارروائیاں منعقد ہوں گی۔
اطلاعات کے مطابق، اجلاس کا آغاز ۲۳؍اکتوبر کو مرحوم اراکین کے لیے تعزیتی قراردادوں کے ساتھ کیا جائے گا، جس کے بعد باقاعدہ کارروائیوں کا سلسلہ شروع ہوگا۔
کیلنڈر کے مطابق۲۴؍اکتوبر کو راجیہ سبھا کی چار نشستوں کے انتخابات کی وجہ سے اسمبلی کی کارروائی ملتوی رہے گی، جبکہ۲۵؍اکتوبر کو غیر نشست یوم قرار دیا گیا ہے ۔ ۲۶؍اکتوبر اتوار ہونے کی وجہ سے بھی کارروائی نہیں ہوگی۔
سرکاری کام ۲۷‘۳۰؍اوت۳۱؍اکتوبر کو شروع ہوں گے ، جبکہ ۲۸؍ اور۲۹؍ اکتوبر کو بالترتیب نجی اراکین کے بلوں اور قراردادوں کے لیے شیڈول کیا گیا ہے۔
ذرائع کے مطابق اس اجلاس کے دوران ریاستی درجہ کی بحالی، زمین سے متعلق نئے قوانین، روزگار پالیسی اور جموں و کشمیر کی ترقیاتی اسکیموں سے متعلق کئی اہم معاملات پر بحث متوقع ہے ۔
قانون ساز اسمبلی کا یہ پہلا مکمل موسم خزاں کا اجلاس ایسے وقت منعقد ہو رہا ہے جب حالیہ مہینوں میں مختلف سیاسی جماعتوں کے درمیان ریاستی درجہ کی بحالی اور مقامی قوانین پر شدید بحث جاری ہے ۔
توقع ہے کہ اجلاس کے دوران اپوزیشن جماعتیں حکومت سے عوامی مفادات، روزگار اور زمین پالیسی سے متعلق سخت سوالات اٹھائیں گی۔
سرکاری ذرائع نے اشارہ دیا ہے کہ اسمبلی اجلاس کے دوران کچھ اہم بل بھی متعارف کرائے جا سکتے ہیں، جن میں بنیادی ڈھانچے ، پنچایتی راج اصلاحات اور اقتصادی ترقی سے متعلق ترامیم شامل ہوں گی۔ایجنسیز