نڈا نے کرور حادثے میں ہلاک افراد کو خراج عقیدت پیش کیا، تحقیقات کے لیے وفد تشکیل دیا

نئی دہلی، 29 ستمبر (یو این آئی) بھارتیہ جنتا پارٹی (بی جے پی) کے قومی صدر جے پی نڈا نے کرور میں ریلی کے دوران ہوئی ہلاکتوں پر تعزیت کا اظہار کیا اور زخمیوں کی جلد صحت یابی کی دعا کی ہے ۔
انہوں نے کروردورے کے لیے این ڈی اے کا ایک آٹھ رکنی وفد تشکیل دیا ہے ۔ یہ وفد کرور جا کر حادثے کی تحقیقات کرے گا اور متاثرہ خاندانوں سے ملاقات کے بعد جلد ہی ایک رپورٹ پیش کرے گا۔
وفد میں بی جے پی کی رکن پارلیمنٹ ہیما مالنی، انوراگ ٹھاکر، تیجسوی سوریا اور سابق ڈی جی پی برج لال، شیو سینا کے رکن پارلیمنٹ شری کانت شندے ، اپراجیتا سارنگی، ریکھا شرما اور تلگو دیشم پارٹی کے رکن پارلیمنٹ پُٹا مہیش کمار شامل ہیں۔
قابل ذکر ہے کہ ہفتے کے روز تمل ناڈو کے کرور میں اداکار سے رہنما بنے ٹی وی کے سربراہ تھلپتی وجے کی ریلی ہوئی تھی۔ ریلی میں توقع سے زیادہ ہجوم جمع ہو گیا اور مبینہ طور پر ایک بچی کے لاپتہ ہونے کی افواہ سے یا بجلی کٹنے سے ہلچل مچی اور ہجوم میں افراتفری کی صورتحال پیدا ہوئی۔
اس افراتفری کے نتیجے میں 41 افراد ہلاک ہوگئے جبکہ 60 سے زائد افراد زخمی ہوئے ہیں، جن میں سے کم از کم دو کی حالت تشویشناک بتائی گئی ہے ۔
تمل ناڈو حکومت نے اس حادثے کی تحقیقات کے لیے عدالتی کمیشن قائم کیا ہے ، جس نے متاثرہ کنبوں سے بات چیت شروع کر دی ہے اور ہسپتال کا دورہ بھی کیا ہے ۔