جموں پولیس نے قتل کیس کو بے نقاب کرکے شوہر کو گرفتار کیا

جموں/۲۹ستمبر
جموں پولیس نے پیشہ ورانہ مہارت کا مظاہرہ کرکے ایک ایسے قتل کیس، جس کو ابتدائی طور پر قدرتی موت کے طور پر پیش کیا گیا تھا، کو بے نقاب کرکے شوہر کو گرفتار کیا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ ۲۶ستمبر۲۰۲۵کو سبینہ سونوار دختر اکبر خان ساکن ڈھوال والی گلی نئی بستی جموں نے اپنی بہن سمریتی سونوار زوجہ تیج پال سنگھ ولد سبھاش سنگھ ساکلن منگنار، ضلع پونچھ حال ترکوٹہ نگر ایکسٹنشن جموں، کی مشکوک موت کے بارے میں تحریری شکایت درج کرائی۔
ترجمان نے کہا’’شکایت کنندہ نے بتایا کہ ۲۶ ؍اگست کو اس کے بہنوی تیج پال سنگھ نے اپنی بیوی کو مبینہ طور پر علاج کیلئے لے گئے لیکن اگلے دن یعنی۲۷؍اگست کو وہ اس کی لاش لے کر واپس آئے اور اس کی شاستری نگر شمشان گھاٹ میں جلد بازی میں آخری رسومات انجام دیں اور یہ کام پوسٹ مارٹم کرنے اور پولیس کو اطلاع دئے بغیر کیا گیا تاکہ ثبوت چھپایا جا سکے ‘‘۔
ان کا کہنا تھا’’شکایت کنندہ نے مزید الزام لگایا کہ مذکورہ خاتون پر ظلم کیا جاتا تھا‘اس کی گردن پر مشکوک نشان موجود تھے اور دونوں کے درمیان نئے گھر کی خریداری پر مالی تنازعہ چل رہا تھا اور ان الزامات کی حمایت میں تصاویر بھی جمع کرائی گئیں‘‘۔
پولیس ترجمان نے بتایا کہ اس شکایت پر پولیس سٹیشن باہو فورٹ میں بی این ایس کے دفعہ۱۰۳کے تحت ایک ایف آئی آر زیر نمبر۲۰۲۵/۲۸۶درج کیا گیا اور تحقیقات شروع کی گئی۔
ترجمان نے کہا کہ اس دوران ایک تحقیقاتی ٹیم جس میں ایف ایس ایل ٹیم اور کرائم فوٹو گرافر شامل تھے ، نے ملزم کے کرایے کے مکان کا معائنہ کیا اور متعلقہ شواہد جمع کئے اور گواہوں کے بیانات بھی قلمبند کئے ۔
ان کا کہنا ہے کہ سائنسی تجزیے اور جمع شدہ شواہد کی بنیاد پر ملزم تیج پال سنگھ کو گرفتار کیا گیا اور اس کیس کی مزید تحقیقات جاری ہے۔یو این آئی