مودی نے منی پور میں نیپال کی پیش رفت کا تذکرہ کیا

امپھال، 13 ستمبر (یو این آئی) گزشتہ کئی مہینوں سے نسلی تشدد سے نبرد آزما منی پور میں وزیر اعظم نریندر مودی نے اس ہفتے نیپال میں ہونے والی پیش رفت کا تذکرہ کرتے ہوئے کہا کہ اب وہاں کے نوجوان صفائی ستھرائی کے کام میں لگے ہوئے ہیں اور ان کی مثبت سوچ متاثر کن ہے اور نیپال کے نئے دور کا واضح اشارہ ہے ۔
ڈھائی سال قبل منی پور میں نسلی تشدد شروع ہونے کے بعد پہلی بار ریاست کا دورہ کرنے والے مسٹر مودی نے جمعہ کے روز ریاست کے لیے 8500 کروڑ روپے کے ترقیاتی منصوبوں کا سنگ بنیاد رکھا اور افتتاح کیا۔ انہوں نے منی پور کی تمام تنظیموں سے اپیل کی کہ وہ امن کا راستہ اپنائیں اور منی پور کی ترقی کے خوابوں کو پورا کرنے کے لیے لوگوں کے ساتھ مل کر کام کریں۔
قابل ذکر ہے کہ نیپال میں رواں ہفتے نوجوان بدعنوانی اور سوشل میڈیا پر پابندی کے خلاف سڑکوں پر نکل آئے ۔ اس دوران انہوں نے پارلیمنٹ سمیت کئی سرکاری عمارتوں کو آگ لگائی اور توڑ پھوڑ کی لیکن دو دن بعد جب وہاں حالات پرامن ہوگئے تو اب وہ سڑکوں کی صفائی ستھرائی میں مصروف ہیں۔ مسٹر نریندر مودی نے یہاں ایک جلسہ عام میں اس پیش رفت کا ذکر کرتے ہوئے کہا، "نیپال میں ہونے والی پیش رفت میں ایک خاص بات ہے … جس پر لوگوں نے توجہ نہیں دی، پچھلے دو تین دنوں سے نیپال کے نوجوان بڑی محنت اور پاکیزگی کے ساتھ نیپال کی سڑکوں کی صفائی اور پینٹنگ کرتے نظر آ رہے ہیں۔ میں نے ان کی تصویریں بھی سوشل میڈیا پر آتی دیکھی ہیں، یہ مثبت سوچ، یہ مثبت کام ان کے اندر نئے جذبے میں اضافہ ہی نہیں، بلکہ ان کے مثبت کاموں میں بھی واضح اضافہ ہے ۔
نیپال کو ہندوستان کا سچا دوست بتاتے ہوئے وزیر اعظم نے کہا، "آج منی پور کی اس سرزمین سے ، میں نیپال کے اپنے بھائیوں اور بہنوں سے بھی بات کرنا چاہتا ہوں۔ ہمالیہ کی گود میں واقع نیپال ہندوستان کا سچا دوست ہے ۔ ہم مشترکہ تاریخ اور اعتماد سے بندھے ہوئے ہیں، اور ہم مل کر آگے بڑھ رہے ہیں۔” نیپال میں عبوری حکومت کی باگ ڈور سنبھالنے والی سشیلا کارکی کو مبارکباد دیتے ہوئے مسٹر مودی نے امید ظاہر کی کہ وہ نیپال میں خوشحالی کی راہ ہموار کریں گی۔ انہوں نے کہا، "آج، 140 کروڑ ہندوستانیوں کی طرف سے ، میں نیپال میں عبوری حکومت کے وزیر اعظم کا عہدہ سنبھالنے پر محترمہ سشیلا جی کو تہہ دل سے مبارکباد دیتا ہوں۔ مجھے یقین ہے کہ وہ نیپال میں امن، استحکام اور خوشحالی کی راہ ہموار کریں گی۔ میں نیپال کے روشن مستقبل کے لیے نیک خواہشات کا اظہار کرتا ہوں۔”