بانہال میں دو کمسن بچوں سمیت تین لاشیں برآمد:پولیس

جموں،سری نگر قومی شاہراہ کے چملواس علاقے میں پیر کے روز ایک دل دہلا دینے والے واقعے میں دو کمسن بچوں اور ایک خاتون کی لاشیں ایک پل کے نیچے سے برآمد کی گئیں، جس سے پورے علاقے میں سنسنی پھیل گئی۔
عینی شاہدین کے مطابق شاہراہ پر گزرنے والے چند راہگیروں نے ایک کلورٹ کے نیچے لاشوں کو دیکھا اور فوراً پولیس کو اطلاع دی۔ اطلاع ملتے ہی پولیس اور ریسکیو ٹیمیں جائے وقوعہ پر پہنچ گئیں اور لاشوں کو اپنی تحویل میں لے لیا۔
پولیس کے ایک افسر نے بتایا کہ برآمد ہونے والی لاشوں میں دو نابالغ بچے اور ایک خاتون شامل ہیں۔ فوری طور پر ان کی شناخت نہیں ہو سکی ہے اور نہ ہی موت کی اصل وجوہات سامنے آ سکی ہیں۔
افسر نے مزید کہا کہ لاشوں کو طبی جانچ اور پوسٹ مارٹم کے لیے اسپتال منتقل کر دیا گیا ہے تاکہ حقائق سامنے آ سکیں۔ ابتدائی طور پر یہ واضح نہیں ہو سکا کہ آیا یہ حادثاتی موت ہے ، خودکشی کا معاملہ ہے یا اس کے پیچھے کوئی اور وجہ پوشیدہ ہے ۔
ادھر پولیس نے اس افسوسناک واقعے کی تحقیقات شروع کر دی ہیں۔ جائے وقوعہ کے اردگرد شواہد اکھٹے کیے جا رہے ہیں اور مقامی لوگوں سے بھی پوچھ تاچھ کی جا رہی ہے تاکہ واقعے کی اصل کہانی سامنے آ سکے ۔
واضح رہے کہ جموں،سرینگر شاہراہ پر اکثر اوقات حادثات پیش آتے رہتے ہیں، تاہم دو بچوں اور ایک خاتون کی بیک وقت پر اسرار اموات نے لوگوں کو سکتے میں ڈال دیا ہے ۔
پولیس نے یقین دلایا ہے کہ واقعے کی مکمل تحقیقات کی جائے گی اور حقائق جلد عوام کے سامنے لائے جائیں گے ۔