جہلم اور اس کی معاون ندیوں میں پانی کی سطح میں بتدریج کمی

وادی کشمیر میں موسم میں بہتری کے ساتھ ہی دریائے جہلم کی تلاطم خیز موجوں میں بھی تھمنے کے آثار نظر آنے لگے ہیں اور سنگم اور رام منشی باغ میں پانی کی سطح خطرے کے نشان نیچے گر گئی ہے تاہم پامپور میں پانی کی سطح خطرے کے نشان سے اوپر برقرار ہے ۔
حکام نے لوگوں سے بدوستو ہوشیار اور محتاط رہنے کی اپیل کی ہے ۔
حکام نے کہا کہ رات بھر جہلم کے کسی بھی حصے میں کوئی شگاف نہیں ہوا، اور رام منشی باغ میں دو فٹ سے زیادہ پانی اتر گیا۔
محکمہ آبپاشی اور فلڈ کنٹرول کے مطابق جمعہ کی صبح ۸بجے سنگم میں پانی کی صبح۱۸:۲۰فٹ تھی جو خطرے کے نشان سے نیچے تھی جبکہ پامپور میں۷۴:۵میٹر تھی جو خطرے کے نشان سے اوپر تھی۔ رام منشی باغ میں پانی کی سطح۴۹:۲۰ تھی جو خطرے کے نشان سے نیچے تھی۔انہوں نے کہا کہ اشم اور ولر میں بھی پانی کی سطح خطرے کے نشان سے نیچے ریکارد ہوئی ہے ۔
ان کا کہنا ہے کہ دوسری شاخیں کھڈونی میں ویشو نالہ، وچھی میں رام بریا نالہ۔ بٹکوٹ میں لدر نالہ اور ددر ہامی میں سندھ نالہ بھی خطرے کے نشان سے نیچے بہہ رہے ہیں۔
حکام نے لوگوں سے دریائوں اور ندی نالوں کے نزدیک جانے سے احتراز کرنے کی تاکید کی ہے ۔انہوں نے کہا کہ دریا کی سطح میں اچانک تبدیلی کی صورت میں فوری کارروائی کو یقینی بنانے کے لیے کوئیک رسپانس ٹیمیں حساس علاقوں میں تعینات کی گئی ہیں۔
ادھر حکام نے ایک ہفتے تک جاری رہنے والی بارشوں، تیز ہوائوں اور سیلاب کے باعث کئی اسکولی عمارتوں کو نقصان پہنچنے کے پیش نظر وادی کشمیر میں۸ستمبر تک تمام سرکاری و غیر سرکاری اسکول بند رکھنے کا اعلان کیا ہے ۔