سری نگر میں پانی کی عدم دستیابی پر احتجاج

سرینگر کے بلوارڈ ڈلگیٹ کے رہائشیوں نے جمعے کو پینے کے پانی کی شدید قلت کے خلاف احتجاج کرتے ہوئے الزام لگایا کہ محکمہ پی ایچ ای صاف اور معیاری پانی کی فراہمی میں بری طرح ناکام ثابت ہوا ہے ۔
مظاہرین کا کہنا تھا کہ کئی دنوں سے گھروں میں پینے کے پانی کی سپلائی متاثر ہے جس سے عام لوگوں کو سخت مشکلات کا سامنا ہے ۔ ان کا الزام تھا کہ بارہا شکایات درج کرانے کے باوجود محکمہ پی ایچ ای نے کوئی مؤثر قدم نہیں اٹھایا۔
پولیس اور محکمہ پی ایچ ای کے حکام جائے موقع پر پہنچے اور لوگوں کو یقین دلایا کہ پانی کی قلت کو دور کرنے کے لئے ہنگامی بنیادوں پر اقدامات کئے جا رہے ہیں۔
پی ایچ ای کے ایک سینئر عہدیدار نے یو این آئی کو بتایا کہ حالیہ سیلابی صورتحال کے نتیجے میں واٹر سپلائی اسکیمیں متاثر ہوئی ہیں۔ انہوں نے کہا’’جمعے کی شام سے شہر کے سبھی علاقوں میں پانی کی فراہمی بحال کر دی جائے گی‘‘۔
عہدیدار نے لوگوں کو مشورہ دیا کہ وہ حفاظتی نقطۂ نظر سے فراہم کیا جانے والا پانی ابال کر استعمال کریں تاکہ کسی بھی بیماری سے بچا جا سکے ۔