حکومت اس بات کو یقینی بنائے گی کہ جی ایس ٹی اصلاحات کے فوائد ہر قیمت پر عوام تک پہنچیں: بی جے پی

نئی دہلی، 05 ستمبر (یواین آئی) مرکزی کامرس اور صنعت کے وزیر پیوش گوئل نے جمعہ کو کہا کہ مرکزی حکومت کی مختلف وزارتیں اس بات کو یقینی بنانے کے لیے مربوط کوششیں کر رہی ہیں کہ گڈز اینڈ سروسز ٹیکس (جی ایس ٹی) کی شرحوں میں کمی کے فوائد عوام تک پہنچیں۔ اس کے ساتھ انہوں نے کہا کہ صنعت نے انہیں یقین دلایا ہے کہ وہ جی ایس ٹی کی شرحوں میں کمی کے فوائد کو عوام تک پہنچائیں گے ۔
بھارتیہ جنتا پارٹی (بی جے پی) کے ہیڈکوارٹر میں نامہ نگاروں سے بات کرتے ہوئے مسٹر گوئل نے کہا کہ وزیر اعظم نریندر مودی نے جی ایس ٹی کی شرحوں میں کمی کرکے عوام کو آزادی کے بعد ٹیکس کے محاذ پر سب سے بڑی راحت دی ہے ۔ انہوں نے کہا کہ کسانوں، خواتین اور ہر طبقے کے صارفین کو 22 ستمبر کو نوراتری کے پہلے دن تحفہ ملے گا۔
مرکزی وزیر نے کہاکہ "میں جی ایس ٹی کی شرحوں میں کمی کی تاریخی اور جامع تبدیلی کے لیے وزیر اعظم نریندر مودی جی کا شکریہ ادا کرتا ہوں۔ ان کا یہ فیصلہ ملک کو نئی بلندیوں پر لے جائے گا۔”
مسٹر گوئل نے کہا کہ ملک کے صارفین کو اتنی بڑی راحت دی گئی ہے ، یہ ‘ایز آف ڈوئنگ بزنس ‘ کے لیے کارگر ثابت ہوگی۔ انہوں نے کہا کہ اس فیصلے کے ساتھ ہمارے ملک کے کسانوں، نوجوانوں، خواتین، ایم ایس ایم ای اور ہر زمرے کے صارفین کو 22 ستمبر کو ایک نئے جوش و جذبے کے ساتھ نوراتری کے پہلے دن ایک بڑا تحفہ ملنے والا ہے ۔
انہوں نے کہا کہ جیسا کہ آپ جانتے ہیں کہ 15 اگست کو وزیر اعظم نے لال قلعہ کی فصیل سے ملک سے وعدہ کیا تھا کہ اب ملک آگے نکل چکا ہے ، یہ نہیں رکے گا، نہیں جھکے گا۔