جموں//
منشیات فروشوں کے خلاف لڑائی جاری رکھتے ہوئے جموں کشمیر پولیس نے ضلع سانبہ میں ایک بدنام زمانہ منشیات فروش کی لاکھوں روپیے مالیت کی غیر منقولہ جائیداد ضبط کی ہے ۔
ایک پولیس ترجمان نے اپنے ایک بیان میں کہا کہ سانبہ پولیس نے ایک بدنام زمانہ منشیات فروش کے یک منزلہ رہائشی مکان اور ایک گؤخانے جس کی مالیت ۵۰ء۴۴لاکھ رویے ہے ، کو ضبط کرلیا ہے ۔
منشیات فروش کی شناخت شم دین ولد مرید علی ساکن سرور اڈہ تحصیل بری برہمنہ ضلع سانبہ کے طور پر ہوئی ہے ۔
ترجمان نے کہا کہ یہ کارروائی این ڈی پی ایس ایکٹ کے دفعات۶۸؍ای اور۶۸ایف کے تحت پولیس اسٹیشن بری برہمنہ میں درج مقدموں کے تحت انجام دی گئی۔
ان کا کہنا ہے کہ پولیس کی طرف سے تحقیقات کے دوران یہ معلوم ہوا کہ اس جائیداد کو غیر قانونی طور پر حاصل کیا گیا ہے اور ابتدائی طور پتہ چلا کہ اس کو منشیات کے غیر قانونی کارو بار سے حاصل کیا گیا ہے ۔
بیان میں کہا گیا کہ یہ کارروائی پولیس کی منشیات کے خلاف جنگ کے عزم کو ظاہر کرتی ہے ۔انہوں نے کہا کہ مقامی لوگوں نے پولیس کی اس کارروائی کی ستائش کی ہے ۔
