جموں///
فوج کی شمالی کمان کے سربراہ لیفٹیننٹ جنرل پرتیک شرما نے بدھ کے روز جموں خطے کے حساس اضلاع ڈوڈہ، رام بن اور کشتواڑ کے دورے پر سیکورٹی صورتحال اور جاری انسدادِ دہشت گردی کارروائیوں کا جائزہ لیا۔
شمالی کمانڈ ہیڈکوارٹر کی جانب سے جاری بیان کے مطابق لیفٹیننٹ جنرل پرتیک شرما نے تینوں اضلاع میں موجود فوجی اور نیم فوجی دستوں کی کارروائیوں کا معائنہ کیا اور مقامی سیکورٹی افسروں کے ساتھ اعلیٰ سطحی میٹنگز بھی کیں تاکہ خطے میں امن و امان قائم رکھنے اور جاری دہشت گردانہ سرگرمیوں کو مؤثر طریقے سے کچلنے کے لیے لائحہ عمل تیار کیا جا سکے ۔
قابل ذکر ہے کہ گذشتہ ایک ماہ سے زائد عرصے سے ڈوڈہ، رام بن اور کشتواڑ کے دشوار گزار پہاڑی علاقوں میں دہشت گردوں کی موجودگی کی اطلاعات موصول ہو رہی ہیں، جس کے بعد فوج، جموں و کشمیر پولیس اور سی آر پی ایف کی مشترکہ ٹیمیں ان علاقوں میں بڑے پیمانے پر تلاشی و محاصرہ کارروائیاں انجام دے رہی ہیں۔
ذرائع کے مطابق کئی مقامات پر دہشت گردوں کے ساتھ آمنا سامنا بھی ہوا ہے جبکہ ان کے ممکنہ ٹھکانوں کو تباہ کرنے کی کارروائیاں تیز کر دی گئی ہیں۔ ڈوڈہ اور کشتواڑ کے گھنے جنگلات اور بلند و بالا پہاڑی سلسلے دہشت گردوں کے چھپنے کے لیے موزوں سمجھے جاتے ہیں، اسی لیے وہاں فضائی نگرانی کے ساتھ ساتھ زمین پر فوجی گشت بھی بڑھا دیا گیا ہے ۔
لیفٹیننٹ جنرل پرتیک شرما نے ان کارروائیوں میں شامل جوانوں کے حوصلے کو سراہتے ہوئے کہا کہ شمالی کمان ہر چیلنج سے نمٹنے کے لیے تیار ہے اور شہریوں کی سلامتی و امن کو یقینی بنانے کے لیے ہر ممکن اقدام اٹھائے جائیں گے ۔ انہوں نے مقامی انٹیلی جنس نیٹ ورک کو مزید فعال بنانے پر زور دیا تاکہ دہشت گردوں کی نقل و حرکت پر کڑی نگاہ رکھی جا سکے ۔
فوجی ذرائع کا کہنا ہے کہ جاری آپریشنز کا مقصد نہ صرف دہشت گردوں کو بے اثر کرنا ہے بلکہ مستقبل میں ان کی دوبارہ سرگرمیوں کو روکنے کے لیے علاقائی سیکورٹی گرڈ کو مضبوط کرنا بھی ہے ۔
- ذرائع کے مطابق، آنے والے دنوں میں انسداد دہشت گردی کارروائیوں میں مزید شدت لانے کا امکان ہے تاکہ علاقہ کو مکمل طور پر دہشت گردی سے پاک کیا جا سکے ۔
