سرینگر//
سیاحتی مقام پہلگام میں جمعرات کو پیش آئے سڑک حادثے میں ایک شخص جان کی بازی ہار گیا جبکہ دوسرا شدید زخمی ہوا ہے ۔
ذرائع نے بتایا کہ یہ حادثہ لدرو پہلگام لنک روڈ پر اس وقت پیش آیا جب ایک گاڑی بے قابو ہو کر الٹ گئی۔
حادثے کے فوراً بعد گاڑی کے ڈرائیور اور اس کے ساتھی کو زخمی حالت میں سب ضلع ہسپتال پہلگام منتقل کیا گیا، جہاں ڈاکٹروں نے ایک زخمی، اُرجیل سنگھ ولد تریلوک سنگھ ساکن نگین پورہ ترال کو مردہ قرار دیا۔
جبکہ ڈرائیور‘منجیت سنگھ ولد جگندر سنگھ ساکن نوگام سنگھ پورہ کو ابتدائی طبی امداد کے بعد گورنمنٹ میڈیکل کالج اننت ناگ ریفر کیا گیا ہے‘ جہاں اس کی حالت بھی نازک بتائی جا رہی ہے ۔
ادھر، پولیس نے واقعے کا نوٹس لیتے ہوئے قانونی کارروائی شروع کر دی ہے ۔
