سرینگر//
انسدادِ بدعنوانی بیورو (اے سی بی) نے محکمہ بجلی سب ڈویژن پٹن، بارہمولہ میں تعینات لائن مین منظور احمد بٹ کو پانچ ہزار روپے رشوت لیتے ہوئے رنگے ہاتھوں گرفتار کر لیا۔
اے سی بی کو ایک تحریری شکایت موصول ہوئی کہ منظور احمد بٹ، جو اس وقت پنزی نارہ، شالہ ٹینگ سرینگر میں میٹر ریڈر کے طور پر تعینات ہے ‘ نے شکایت کنندہ سے ایک نئے رہائشی مکان کے لیے بجلی کنکشن فراہم کرنے کی خاطر پانچ ہزار روپیہ رشوت طلب کی۔
شکایت کنندہ نے رشوت دینے سے انکار کرتے ہوئے قانونی کارروائی کیلئے اے سی بی سے رجوع کیا۔
تحقیقات کی غرض سے ایک خفیہ تصدیقی عمل شروع کیا گیا‘جس میں الزامات درست پائے گئے ۔ اس کے بعد پولیس اسٹیشن اے سی بی سرینگر میں انسدادِ بدعنوانی ایکٹ۱۹۸۸(ترمیم شدہ) کی دفعہ ۷کے تحت ایف آئی آر نمبر۲۰۲۵/۱۳درج کر کے باضابطہ تحقیقات شروع کی گئی۔
تحقیقات کے دوران ایک خصوصی ٹریپ ٹیم تشکیل دی گئی، جس نے پنزی نارہ شالتنگ میں کامیاب کارروائی انجام دیتے ہوئے ملزم منظور احمد بٹ کو رشوت لیتے ہوئے رنگے ہاتھوں گرفتار کیا۔
اے سی بی ٹیم نے قانونی تقاضوں کو پورا کرتے ہوئے موقع پر ہی ملزم کو گرفتار کیا اور رشوت کی رقم بھی اس کی تحویل سے برآمد کر کے ضبط کی۔
اے سی بی نے بتایا کہ اس مقدمے کی مزید تحقیقات جاری ہے۔
