پانپور میں معاون دہشت گرد کے گھر پر پولیس کا چھاپہ

سرینگر//
اونتی پورہ پولیس نے اتوار کے روز پانپور کے لدو بٹہ پورہ علاقے میں ایک دہشت گردی سے متعلق کیس کی تفتیش کے سلسلے میں چھاپہ مار کارروائی انجام دی۔
پولیس کے مطابق یہ چھاپہ محمد مقبول وانی نامی ایک معاون دہشت گرد کے گھر پر مارا گیا، جو اس وقت ضلع جیل پلوامہ میں عدالتی تحویل میں ہے ۔
مذکورہ کارروائی پولیس تھانہ اونتی پورہ میں درج ایف آئی آر نمبر۲۰۲۵/۲۴کے تحت کی گئی، جس میں وانی کی دہشت گرد سرگرمیوں میں مبینہ شمولیت کی تحقیقات جاری ہے ۔
پولیس کے ایک ترجمان نے بتایا کہ یہ چھاپہ سب ڈویژنل پولیس آفیسر (ایس ڈی پی او) اونتی پورہ اور ایک ایگزیکٹیو مجسٹریٹ کی موجودگی میں قانونی طریقہ کار کے تحت انجام دیا گیا۔
اونتی پورہ پولیس نے واضح کیا ہے کہ ایسے تمام افراد کے خلاف قانونی کارروائی جاری رہے گی جو تخریبی یا غیر قانونی سرگرمیوں میں ملوث پائے جائیں گے ۔
پولیس نے عزم ظاہر کیا ہے کہ دہشت گردی کے نیٹ ورک کو جڑ سے ختم کرنے تک ایسے چھاپے اور تلاشی کارروائیاں جاری رہیں گی، تاکہ ضلع میں پائیدار امن و امان کو یقینی بنایا جا سکے ۔