جموں:مویشی اسمگلر سمیت دو افراد پر پبلک سیفٹی ایکٹ عائد

جموں//
جموں کشمیر پولیس نے ہفتے کے روز دو افراد کو پبلک سیفٹی ایکٹ کے تحت گرفتار کیا، جن میں ایک مبینہ مویشی اسمگلر بھی شامل ہے ۔
پولیس ترجمان کے مطابق اُدھم پور ضلع میں رہائش پذیر مکھن لال کو مویشی اسمگلنگ کے کئی مقدمات میں ملوث پایا گیا چنانچہ کئی مرتبہ حراست میں لینے کے باوجود بھی وہ غیر قانونی سرگرمیاں جاری رکھے ہوئے تھا۔
ترجمان نے مزید بتایا کہ ضلعی مجسٹریٹ اُدھم پور کے حکم پر مکھن لال کو پی ایس اے کے تحت جیل بھیج دیا گیا ہے ۔ ترجمان نے کہا کہ اس کے مجرمانہ رجحانات نے علاقے کے پرامن ماحول کو بگاڑنے کی کوشش کی، جس پر سخت کارروائی ناگزیر بن گئی تھی۔
دوسری جانب کشتواڑ ضلع میں پولیس نے بد نامہ زمانہ منشیات فروش عمران حسین گری کو پی ایس اے کے تحت حراست میں لے کر ضلع جیل اُدھم پور منتقل کر دیا۔
پولیس ترجمان کے مطابق عمران گری نوجوانوں کو منشیات فراہم کرنے والا ایک مرکزی اسمگلر تھا، اور اس کے خلاف منشیات فروشی کے کئی مقدمات درج ہیں۔
ترجمان نے کہا’’‘تحقیقات سے یہ ثابت ہوا ہے کہ عمران نوجوانوں کو نشے کی لت میں دھکیلنے میں کلیدی کردار ادا کر رہا تھا۔ اس کی سرگرمیوں کو روکنے اور نوجوانوں کے مستقبل کو بچانے کے لیے پبلک سیفٹی ایکٹ کے تحت کارروائی عمل میں لائی گئی‘‘۔
پولیس کا کہنا ہے کہ منشیات کی لعنت پر قابو پانے کے لیے ایسی کارروائیاں مستقبل میں بھی جاری رہیں گی۔