جموں وکشمیر میں گرمی کی لہر محکمہ تعلیم نے گائیڈ لائنز جاری کیں

سرینگر//
جموں کشمیر میں جاری شدید گرمی کے پیش نظر محکمہ تعلیم نے سکولوں کے لئے گائیڈ لائنز جاری کی ہیں۔
محکمے کی طرف سے جاری گائیڈ لائنز میں کہا گیا ہے کہ بچے گرمی سے زیادہ جلد متاثر ہوتے ہیں اور انہیں بڑوں سے کم پسینہ آتا ہے ۔
گائیڈ لائنز میں اسکول سربراہان سے کہا گیا ہے کہ وہ بچوں کے تحفظ کیلئے چند نکات پر عملدر آمد کو یقینی بنائیں۔ان نکات میں اسکولوں میں بچوں کیلئے پانی پینے کیلئے متواتر وقفے رکھنا، بچوں کو۱۱سے صبح سے۴بجے تک براہ راست سورج سے دور رکھنا، بیرونی سرگرمیوں کو محدود کرنا، اس بات کو یقینی بنانا کہ کھیل کا میدان یا اسکول فرنیچر زیادہ گرم نہیں ہے اور کلاس روموں میں درجہ حرارت کو مانیٹر کرنا شامل ہے ۔
اسکول سربراہان سے کہا گیا ہے کہ بچوں کو پیاس محسوس نہ ہونے کے باوجود بھی پانی پینے کی تاکید کریں۔
اسکول سربراہان کو چھوٹے بچوں، جسمانی طور معذور بچوں اور مریض بچوں کا خاص خیال رکھنے کی ہدایت دی گئی ہے نیز ان سے کہا گیا ہے کہ وہ گرمی کی بیماری کی علامات پر بھی باریک بینی سے نگاہ رکھیں۔
قابل ذکر ہے کہ محکمہ موسمیات کے مطابق جموں و کشمیر میں۱۳جون تک گرمی کی لہر سے راحت ملنے کی کوئی امید نہیں ہے ۔