کاونٹر انٹلی جنس کشمیر نے نقلی پولیس آفیسر کو دھر دبوچا

سرینگر//
کشمیر کی سراغ رساں ایجنسی (سی آئی کے ) نے سرینگر میں ایک ایسے شخص کو گرفتار کیا ہے جو مبینہ طور پر خود کو پولیس افسر ظاہر کر کے لوگوں کو دھمکا رہا تھا۔
گرفتار ملزم نے سی آئی کشمیر کے ایس ایس پی کی تصویر اپنے واٹس ایپ پروفائل پر لگا رکھی تھی تاکہ وہ خود کو اعلیٰ پولیس افسر ظاہر کر سکے ۔
سی آئی کے کے ایک ترجمان نے بتایا کہ کاونٹر انٹیلی جنس کشمیر کو قابل اعتماد ذرائع سے اطلاع موصول ہوئی تھی کہ ایک شخص، برکت علی پرے عرف ’بی کے‘، ولد غلام محمد پرے ، ساکن گنڈحسی بھٹ، شالہ ٹینگ، سری نگر، خود کو ایس ایس پی سی آئی کشمیر ظاہر کر کے سادہ لوح شہریوں کو دھوکہ دے رہا ہے ۔
اطلاع موصول ہونے کے بعد ملزم کو ۹جون کو سری نگر کے جہانگیر چوک علاقے سے حراست میں لیا گیا۔
تفتیش کے دوران اس کے موبائل فون میں سی آئی کشمیر کے ایس ایس پی کی تصویر واٹس ایپ پروفائل پر پائی گئی۔ ابتدائی تفتیش سے پتہ چلا کہ اس نے یہ تصویر انٹرنیٹ سے حاصل کر کے خود کو پولیس افسر ظاہر کرنے کی غرض سے استعمال کی۔
مزید انکشاف ہوا کہ برکت علی پچھلے ایک سال سے آن لائن جوئے میں بھی ملوث رہا ہے ، خاص طور پر’ایوی ایٹر‘اور ’۷۷۷‘جیسے آن لائن گیمبلنگ پلیٹ فارمز پر سرگرم رہا ہے ۔
تفتیشی اہلکاروں کے مطابق ملزم نے’۷۷۷‘پلیٹ فارم پر پیشگی رقم جمع کرائی تھی، جس کی واپسی کے لیے اس نے جعلی شناخت استعمال کرتے ہوئے منتظمین کو دھمکیاں دیں۔
حکام کا کہنا ہے کہ ملزم کے موبائل اور دیگر ڈیجیٹل آلات کی مزید جانچ جاری ہے تاکہ اس کے کسی اور غیر قانونی یا ملک دشمن سرگرمیوں سے تعلق کی تصدیق کی جا سکے ۔
سی آئی کشمیر نے نوجوانوں کو خبردار کیا ہے کہ وہ آن لائن گیمبلنگ ایپس اور پلیٹ فارمز سے دور رہیں کیونکہ ایسے پلیٹ فارمز نوجوانوں کو دھوکہ دے کر سماج دشمن اور ملک دشمن سرگرمیوں میں ملوث کرنے کا ذریعہ بنتے جا رہے ہیں۔