سرینگر میں امسال ایک لاکھ پیڑ پودے لگانے کا منصوبہ:اویس

سرینگر//
سرینگر میونسپل کارپوریشن (ایس ایم سی) کمشنر ‘ڈاکٹر اویس احمد کا کہنا ہے کہ شہر سری نگر میں سال رواں کے دوران ایک لاکھ پیڑ پودے لگائے جائیں گے ۔
احمد نے کہا کہ ایس ایم سی نے اب تک سرینگر میں ۶۰ہزار پودے لگائے ہیں۔
ان کا کہنا تھا کہ عید الضحیٰ کے پیش نظر تمام تیاریوں کو حتمی شکل دی گئی ہے ۔
کمشنر نے ان باتوں کا اظہار جمعرات کو یہاں نامہ نگاروں کے ساتھ بات کرنے کے دوران کیا۔انہوں نے کہا’’آج عالمی یوم ماحولیات کے موقع پر خصوصی شجر کاری مہم چل رہی ہے ، ہم نے آج تک سرینگر میں۶۰ہزار پیڑ پودے لگائے ہیں‘‘۔
احمد کا کہنا تھا’’ایس ایم سی کو اس سال سرینگر میں ایک لاکھ پیڑ پودے لگانے کا منصوبہ ہے ‘‘۔
کمشنر نے کہا کہ اس سال ہم نہ صرف خود پودے لگا رہے ہیں بلکہ مقامی لوگوں کو بھی اس مہم میں شامل کر رہے ہیں تاکہ پودوں کی دیکھ ریکھ کو یقینی بنایا جا سکے ۔انہوں نے کہا کہ اگر ہر کوئی فرد ایک پودے کی دیکھ ریکھ کرنے کی ذمہ داری لے گا تو ہمارے ماحولیات سے متعلق بہت سے مسائل حل ہوسکتے ہیں۔
عید الضحیٰ کے کے بارے میں پوچے جانے پر موصوف کمشنر نے کہا کہ اس سلسلے میں تمام تیاریوں کو حتمی شکل دی گئی ہے ۔انہوں نے کہا کہ اس ضمن میں خصوصی ٹیمیں بنائی گئی ہیں جو گھر گھر جاکرکولیکشن کریں گے ۔