جموں سے سرینگر تک ریل رابطے کا خواب آج شرمندہ تعبیر ہوگا‘

جموں//
مرکزی ریلوے وزیر اشونی ویشنو کا کہنا ہے کہ کل کا دن جموں و کشمیر ہی نہیں بلکہ پورے ملک کے لیے ایک تاریخی سنگ میل بننے جا رہا ہے ، جب وزیر اعظم نریندر مودیکٹرا سے سری نگر تک وندے بھارت ٹرینوں کو ہری جھنڈی دکھا کر روانہ کریں گے ۔
ان کاکہنا ہے’’ یہ اقدام جموں و کشمیر کو ریل کے ذریعے قومی دھارے میں پوری طرح شامل کرنے کی ایک بڑی کوشش ہے ، جو کئی دہائیوں سے عوام کا خواب رہا ہے ‘‘۔
ویشنو نے جموں میں نامہ نگاروں سے بات کرتے ہوئے کہا کہ یہ صرف ایک ریل کا افتتاح نہیں بلکہ بھارت کی انجینئرنگ اور قومی یکجہتی کی عظیم کامیابی ہے ۔
ریلوے وزیر نے کہا کہ وندے بھارت ٹرینیں خاص طور پر کشمیر کے بلند و بالا اور مشکل جغرافیہ کو مدنظر رکھتے ہوئے ڈیزائن کی گئی ہیں۔ ابتدائی طور پر یہ ٹرینیں کٹرا سے سری نگر کے درمیان چلیں گی، جب کہ ستمبر میں جموں سے سرینگر تک براہ راست سروس شروع کی جائے گی، جیسے ہی جموں ریلوے اسٹیشن پر پلیٹ فارم نمبر ۵؍اور ۶کا کام مکمل ہو گا۔
ویشنو نے مزید کہا کہ اس منصوبے میں شامل چناب ریلوے پل دنیا کا سب سے بلند ریلوے آرچ پل ہے ، جس کی تعمیر میں تقریباً ۳۰ہزار میٹرک ٹن اسٹیل استعمال کیا گیا ہے ۔ اسی طرح انجی پل ملک کا پہلا کیبل اسٹے ریلوے پل ہے ، جو اپنی نوعیت کا ایک بے مثال انجینئرنگ شاہکار ہے ۔
وزیر ریلوے نے بتایا کہ ان پلوں کو خاص طور پر ریل کے بھاری لوڈ، تیز ہواؤں اور زلزلوں کے خدشات کو مدنظر رکھتے ہوئے جدید ترین تکنیکوں سے بنایا گیا ہے ۔
ویشنو نے کہا کہ کٹرا سے بانہال کے درمیان۱۱۱کلومیٹر کے سیکشن میں۹۷کلومیٹر سرنگیں شامل ہیں، جنہیں ہمالیائی خطے کی مخصوص ساخت کے مطابق ’ہمالین ٹنلنگ متھڈ‘سے تعمیر کیا گیا ہے ، جو ٹنلنگ کی دنیا میں ایک انقلابی طریقہ سمجھا جا رہا ہے ۔
ریلوے وزیر نے بتایا کہ اس ریل لنک سے نہ صرف لوگوں کی آمد و رفت آسان ہوگی، بلکہ کشمیر کی زرعی پیداوار بھی ملک کے دیگر حصوں تک مؤثر انداز میں پہنچے گی۔ انہوں نے مثال دیتے ہوئے کہا ’’‘سری نگر سے چیری کے پارسل ریلوے کے ذریعے ملک کے مختلف شہروں تک کامیابی سے پہنچائے گئے ہیں، جو اس نئے نظام کی صلاحیت کو ظاہر کرتا ہے ‘‘۔
ویشنو کے مطابق مستقبل قریب میں کشمیر میں چار جدید کارگو ٹرمنلز بھی قائم کیے جائیں گے ، تاکہ تاجروں اور کاشتکاروں کو سامان لانے اور لے جانے میں مکمل سہولت فراہم ہو سکے ۔
ریلوے وزیر نے کہا کہ جموں ریلوے اسٹیشن کو جدید تقاضوں کے مطابق اپ گریڈ کیا جا رہا ہے ، تاکہ وہ مستقبل میں بڑھتے مسافروں اور مال برداری کی ضروریات کو بخوبی پورا کر سکے ۔ ستمبر سے وندے بھارت کی سروس جموں سے بھی براہ راست سری نگر تک دستیاب ہوگی۔
ان کے مطابق وزیر اعظم نریندر مودی کل نہ صرف وندے بھارت ٹرینوں کا افتتاح کریں گے ، بلکہ وہ چناب اور انجی پل کے ساتھ ساتھ ادھمپور،سری نگر،بارہمولہ ریلوے لنک کو بھی قوم کے نام وقف کریں گے ، جس پر تقریباً ۴۳ہزار۷۸۰کروڑ روپے لاگت آئی ہے ۔ اس کے علاوہ وہ ۴۶ہزارکروڑ روپے سے زائد کے ترقیاتی منصوبوں کا افتتاح و سنگ بنیاد بھی رکھیں گے ، جن میں سڑک، صحت، تعلیم اور انفرا اسٹرکچر سے متعلق اہم اسکیمیں شامل ہیں۔
یہ منصوبہ جموں و کشمیر کے عوام کے لیے ایک تاریخی تحفہ ہے ، جو برسوں سے اس لمحے کا انتظار کر رہے تھے ۔ یہ صرف ایک ریل لائن نہیں، بلکہ ترقی، یکجہتی اور امید کا نیا راستہ ہے ۔