چنار کور کمانڈر کا دورہ وادی وارون، سکیورٹی انتظامات کا جائزہ

سرینگر//
چنار کور کے کمانڈر لیفٹیننٹ جنرل پرشانت شریواستوا نے وادی وارون کا کل دورہ کرتے ہوئے سیکیورٹی انتظامات کا باریک بینی سے جائزہ لیا اور علاقے میں تعینات جوانوں کی فرض شناسی اور عزم کو سراہا۔
فوج کی چنار کور نے ایکس پر جانکاری فراہم کرتے ہوئے بتایا’’دورے کے دوران فوجی کمانڈر نے مقامی باشندوں سے بھی تفصیلی ملاقات کی، ان کے تحفظات سنے اور علاقے کی زمینی صورتحال سے متعلق قیمتی آرا حاصل کیں۔ اس موقع پر مقامی لوگوں نے امن و ترقی کے لیے فوج کے کردار کو سراہا اور تعاون جاری رکھنے کی یقین دہانی کرائی‘‘۔
چنار کور کمانڈر نے کہا کہ پرامن ماحول کو برقرار رکھنے کے لیے چوکس رہنا ناگزیر ہے اور فوج کا مقصد صرف سکیورٹی کو یقینی بنانا نہیں بلکہ دور دراز علاقوں میں شہری سہولیات کی فراہمی میں بھی مدد دینا ہے ۔انہوں نے افسران و اہلکاروں کو ہدایت دی کہ وہ علاقے میں موجود ہر خطرے کا بروقت اور موثر انداز میں مقابلہ کریں اور عوام سے قریبی روابط برقرار رکھیں تاکہ باہمی اعتماد کو مزید فروغ دیا جا سکے ۔