بنگس روڈ ایک خواب تھا اب تکمیل کے قریب ہے :سجاد

سرینگر///
جموں کشمیر پیپلز کانفرنس کے صدر سجاد لون نے بنگس روڈ کو ایک خواب کی تعبیر قرار دیتے ہوئے کہا کہ طویل انتظار کے بعد اب یہ روڈ تکمیل کے قریب ہے ۔
لون نے کہا کہ اس کو ایک سڑک اور سیاحتی راہداری کے طور پر تصور کیا گیا تھا۔
پیپلز کانفرنس کے صدر نے یہ باتیں منگل کے روز ’ایکس‘پر ایک پوسٹ میں کیں۔
لون نے کہا’’بنگس روڈ ایسا لگتا ہے کہ آخر کار تکمیل کے قریب ہے ’’ہم نے۲۰۱۷/۲۰۱۶میں اس تصور پر کام شروع کیا، یہ ایک مشکل کام تھا۔ اپنے سی وی میں، آنے والے ہر وقت کیلئے میں فخر کے ساتھ اپنی عاجزانہ شراکت کا اعلان کرتا ہوں‘‘۔
ان کا کہنا تھا’’اس کو ایک سڑک اور ایک سیاحتی راہداری کے طور پر تصور کیا گیا تھا، یہ ۴۰کلو میٹروں پر محیط مثالی آلپائن خوبصورتی کا نظارہ ہے ‘‘۔
لون نے اس روڈ کی تکمیل کا سہرہ ہندوارہ کے روڈس اینڈ بلڈنگس (آر اینڈ بی) ڈویژن کے سر باندھتے ہوئے کہا’’آر اینڈ بی ہندوارہ اس کی تکمیل کے کریڈٹ کا مستحق ہے جنہوں نے اس میں در پیش تمام مشکلات کا سامنا کیا خواہ وہ قدرتی مشکلات تھے یا انسانوں کے پیدا کردہ چلینج تھے ‘‘۔
پیپلز کانفرنس کے صدر نے کہا’’بنگس اور اس کے آس پاس کے علاقے کشمیر کے سیاحتی نقشے میں نمایاں مقام حاصل کریں گے ‘‘۔ان کا کہنا تھا’’انشاء اللہ آنے والی دہائیوں میں لاکھوں لوگوں کے لیے باوقار روزگار پیدا کرے گا۔‘‘