امریکہ ہندوستان کے ساتھ یکجہتی کا اظہار اور دفاع کے حق کی حمایت کرتا ہے :راج ناتھ

نئی دہلی//
پہلگام دہشت گردانہ حملے کے بعد ہندوستان اور پاکستان کے درمیان کشیدگی کے درمیان امریکہ نے ہندوستان کے ساتھ یکجہتی کا اظہار کیا ہے اور اپنے دفاع کے حق کی حمایت کی ہے ۔
امریکی وزیر دفاع پیٹ ہیگستھ نے وزیر دفاع راج ناتھ سنگھ کے ساتھ ٹیلی فون پر بات چیت کے دوران پہلگام دہشت گردانہ حملے میں معصوم شہریوں کی ہلاکت پر گہرے رنج وغم کا اظہار کیا۔ انہوں نے کہا کہ امریکہ ہندوستان کے ساتھ یکجہتی میں کھڑا ہے اور ہندوستان کے اپنے دفاع کے حق کی حمایت کرتا ہے ۔
سنگھ نے امریکی وزیر دفاع کو بتایا کہ پاکستان کی دہشت گرد تنظیموں کی حمایت، تربیت اور فنڈنگ کی تاریخ رہی ہے ۔
سوشل میڈیا پلیٹ فارم ایکس پر ایک پوسٹ میں وزیر دفاع کے دفتر نے کہا’’امریکی وزیر دفاع پیٹ ہیگسٹھ نے آج وزیر دفاع راج ناتھ سنگھ سے بات کی اور پہلگام، جموں و کشمیر میں ہونے والے خوفناک دہشت گردانہ حملے میں معصوم شہریوں کے المناک نقصان پر گہرے رنج و غم کا اظہار کیا‘‘۔
دہشت گردی کے خلاف جنگ میں ہندوستانی وزیر دفاع نے ہیگستھ کو بتایا کہ پاکستان کی دہشت گرد تنظیموں کی حمایت، تربیت اور فنڈنگ کی تاریخ ہے ۔ انہوں نے کہا کہ عالمی برادری کے لیے دہشت گردی کی اس طرح کی گھناؤنی کارروائیوں کی مذمت کرنا اور اجاگر کرنا ضروری ہے ۔
اس دوران وزیر خارجہ ایس جے شنکر نے امریکی وزیر خارجہ مارکو روبیو سے واضح الفاظ میں کہا ہے کہ پہلگام دہشت گردانہ حملے میں قصورواروں، سازش کرنے والوں اور ان کی حمایت کرنے والوں کو ہر قیمت پر انصاف کے دائرے میں لایا جائے گا۔ اس پر مسٹر روبیو نے دہشت گردی کے خلاف جنگ میں ہندوستان کے ساتھ تعاون کرنے کے امریکہ کے عزم کا اعادہ کیا۔
ڈاکٹر جے شنکر نے امریکی وزیر خارجہ سے فون پر بات کرنے کے بعد ایکس پر پوسٹ میں کہا ’’کل امریکی وزیر خارجہ مارکو روبیو کے ساتھ پہلگام دہشت گردانہ حملے پر تبادلہ خیال ہوا۔ اس کے قصورواروں، معاونین اور منصوبہ سازوں کو انصاف کے دائرے میں لایا جانا چاہیے ‘‘۔
اس دوران واشنگٹن میں، امریکی محکمہ خارجہ کے ترجمان ٹیمی بروس نے ایک بیان میں کہا ’’سکریٹری آف اسٹیٹ مارکو روبیو نے آج ہندوستانی وزیر خارجہ سبرامنیم جے شنکر سے بات کی۔ وزیر موصوف نے پہلگام میں خوفناک دہشت گردانہ حملے میں ہلاک ہونے والوں کے لیے تعزیت کا اظہار کیا اور دہشت گردی کے خلاف ہندوستان کے ساتھ تعاون کے لیے امریکہ کے عزم کا اعادہ کیا‘‘۔
ترجمان نے کہا کہ مسٹر روبیو نے ہندوستان کو پاکستان کے ساتھ کشیدگی کم کرنے اور جنوبی ایشیا میں امن و سلامتی کو برقرار رکھنے کے لیے کام کرنے کی بھی ترغیب دی۔