ڈاکٹر غلام نبی فائی اشتہاری مجرم قرار:پولیس

سرینگر//
پولیس کا کہنا ہے کہ بڈگام پولیس نے ڈاکٹر غلام نبی فائی کو غیر قانونی سرگرمیاں (روک تھام ) ایکٹ (یو اے پی اے ) کے تحت درج ایک کیس میں اشتہاری مجرم قرار دلوانے میں کامیابی حاصل کی ہے ۔
ایک پولیس ترجمان نے اپنے ایک بیان میں کہا کہ ایک اہم پیش رفت میں، بڈگام پولیس نے ڈاکٹر غلام نبی فائی کو معزز اسپیشل جج، این آئی اے عدالت، بڈگام کے ذریعے اشتہاری مجرم قرار دلوانے میں کامیابی حاصل کی۔
ترجمان نے کہا’’ڈاکٹر فائی ساکن وڈون بڈگام جو اس وقت امریکہ میں روپوش ہیں، پولیس اسٹیشن بڈگام میں یو اے پی اے کی دفعات۱۰‘۱۳؍اور۳۹کے تحت درج ایف آئی آر زیر نمبر۲۰۲۰/۴۶میں ملوث ہے ‘‘۔
ان کا کہنا ہے’’وارنٹ جاری ہونے کے باوجود، ڈاکٹر فائی مسلسل گرفتاری سے بچتے رہے اور قانونی عمل میں رکاوٹیں ڈالتے رہے ‘‘۔
بیان میں کہا گیا’’ڈاکٹر فائی کے مسلسل عدم تعاون اور گرفتاری سے بچنے کے لیے جان بوجھ کر اپنے آپ کو چھپانے کی کوششوں کی روشنی میں، بڈگام پولیس نے معزز عدالت کے سامنے ایک عرضی پیش کی‘‘۔
ترجمان نے کہا کہ اس درخواست پر عمل کرتے ہوئے عدالت نے۳۰؍اپریل۲۰۲۵کو ڈاکٹر فائی کو اشتہاری مجرم قرار دے دیا۔
پولیس ترجمان نے بتایا کہ عدالت نے ڈاکٹر فائی کو حکم دیا ہے کہ وہ اعلان کی تاریخ سے۳۰دنوں کے اندر جموں و کشمیر پولیس کے سامنے خودسپردگی کریں۔
ترجمان نے کہا کہ بڈگام پولیس انصاف اور گرفتاری سے بچنے والے افراد کے خلاف فوجداری مقدمات کی پیروی کرنے کے اپنے عزم کا اعادہ کرتی ہے ۔