سرینگر؍۱۴نومبر
جموں و کشمیر کانگریس کے صدر طارق حمید قرہ نے ہفتہ کے روز کہا کہ وادی میں حالیہ حملوں نے مرکز کے امن سے متعلق بلند بانگ دعوؤں کو بے نقاب کردیا ہے اور جموں و کشمیر میں بظاہر امن کی صورتحال دراصل ایک فریب پر مبنی خاموشی ہے۔
ملک کے پہلے وزیر اعظم جواہر لعل نہرو کی سالگرہ کے موقع پر پارٹی کی ایک تقریب کے حاشیے پر نامہ نگاروں سے بات کرتے ہوئے قرہ نے کہا کہ کولگام میں سی آر پی ایف اہلکاروں پر حملہ اور کشتواڑ میں دو اسپیشل پولیس افسران (ایس پی اوز) کی ہلاکت نے کشمیر میں امن اور معمولات زندگی کی بحالی سے متعلق دعوؤں پر سوالات کھڑے کردیے ہیں اور مرکز کو جوابدہ بنا دیا ہے۔
قرہ نے کہا، ’’جب بھی اس طرح کا کوئی واقعہ پیش آتا ہے تو حکومت ہند کو جوابدہ ہونا پڑتا ہے۔ آپ نے پارلیمنٹ کے اندر اور باہر وزیر اعظم یا وزیر داخلہ کو بار بار یہ کہتے سنا ہوگا کہ جب ان کے لیے موزوں ہوتا ہے تو وہ کہتے ہیں کہ کشمیر میں مکمل امن ہے اور وہاں کچھ نہیں ہوتا۔‘‘
کانگریسی لیڈر نے وزیر اعظم نریندر مودی اور وزیر داخلہ امت شاہ کو ان بیانات پر تنقید کا نشانہ بنایا جن میں وہ وادی میں کھلی منڈیوں، فعال اسکولوں اور ہڑتالوں یا پتھراؤ کے واقعات نہ ہونے کو امن کا ثبوت قرار دیتے ہیں۔ انہوں نے کہا کہ اس دوران زمینی سطح پر سکیورٹی کی صورتحال کو نظر انداز کیا جاتا ہے۔
قرہ نے کہا، ’’مرکز یہ بھول جاتا ہے کہ یہ فریب پر مبنی خاموشی ہے۔ اگر ایسا نہیں ہے تو پھر اس طرح کے واقعات کیسے پیش آتے ہیں؟‘‘
کانگریسی لیڈر نے الزام لگایا کہ مرکز اس خاموشی کو بین الاقوامی سطح پر امن کے طور پر پیش کرنے کی کوشش کرتا ہے، لیکن اس کی ناقص کارکردگی اور غلط پالیسیوں کے باعث اس کے دعوؤں کی حقیقت سامنے آجاتی ہے۔
قرہ نے کہا، ’’اس طرح کے واقعات بی جے پی کے بلند بانگ دعوؤں، بشمول وزیر اعظم اور وزیر داخلہ کے ان بیانات کو بے نقاب کرتے ہیں کہ سب کچھ ٹھیک ٹھاک ہے۔ یہ حملے سکیورٹی نظام اور حکومت ہند کی اختیار کردہ پالیسیوں کی ناکامی ہیں۔‘‘
اداکارہ اور بی جے پی رکن پارلیمان کنگنا رناوت کی جانب سے کانگریس رہنما سونیا گاندھی کی کتاب سے متعلق دیے گئے بیان پر ردعمل ظاہر کرتے ہوئے قرہ نے کہا کہ وہ رناوت کے بیانات کو سنجیدگی سے نہیں لیتے۔ ان کے مطابق اس طرح کے تبصرے سیاسی پختگی، تہذیب اور اقدار کی کمی کو ظاہر کرتے ہیں۔
کانگریسی لیڈر نے کہا کہ ان بیانات سے نہ تو سونیا گاندھی کے وقار اور احترام میں کوئی کمی آئی ہے اور نہ ہی ملک میں جمہوریت کی بحالی کے لیے ان کے عزم کو کمزور کیا جاسکتا ہے۔
قرہ نے کہا، ’’بس اتنی سی بات ہے کہ بی جے پی اور اس کی ذہنیت بے نقاب ہورہی ہے۔‘‘
جواہر لعل نہرو کو خراج عقیدت پیش کرتے ہوئے قرہ نے انہیں جدید ہندوستان کے سینئر ترین رہنماؤں میں سے ایک قرار دیا جنہوں نے ملک کی آزادی کے لیے عظیم قربانیاں دیں۔انہوں نے کہا کہ نہرو نے جدید ہندوستان کی بنیاد رکھی، جسے بعد میں اندرا گاندھی، راجیو گاندھی اور کانگریس کے دیگر رہنماؤں نے آگے بڑھایا۔
قرہ نے کہا کہ ایک وقت تھا جب ہندوستانی جمہوریت کو دنیا بھر میں سراہا جاتا تھا اور کئی ممالک اس کی پیروی کرتے تھے۔ ان کے مطابق ’’ہندوستانی طرزِ جمہوریت‘‘ دوسروں کے لیے ایک نمونہ بن چکا تھا۔
کانگریسی لیڈر نے کہا، ’’بدقسمتی سے اسی ہندوستانی طرزِ جمہوریت کو، جو کئی ممالک میں جمہوریت کے فروغ کی بنیاد بنا، آج بی جے پی نے اپنے مذموم عزائم کے ذریعے تباہ کردیا ہے۔ اسی جمہوریت کی بحالی کے لیے کانگریس پارٹی نے آج راہل گاندھی کی قیادت میں یہ پہل شروع کی ہے۔‘
۔۔۔۔۔۔۔(ایجنسیاں )
