چناب ریل پل نے جموں کشمیر میں ترقی کے ایک نئے دور کا آغاز کیا: ریلویز

نئی دہلی//
وزیر اعظم نریندر مودی کی جانب سے ۱۹؍اپریل کو اس کے باضابطہ افتتاح سے قبل وزارت ریلوے نے چہارشنبہ کے روز کہا کہ چناب ریل پل نہ صرف دو پہاڑوں کو جوڑتا ہے بلکہ جموں کشمیر کیلئے خواب، ترقی اور ایک نئے دور کو جوڑتا ہے۔
مودی۲۷۲ کلومیٹر طویل ادھم پور،سرینگر،بارہمولہ ریل لنک کی تکمیل کے موقع پر جموں سے سرینگر براستہ کٹرا وندے بھارت ٹرین کو ہری جھنڈی دکھائیں گے۔
ریلوے بورڈ کے ایگزیکٹیو ڈائریکٹر انفارمیشن اینڈ پبلسٹی دلیپ کمار نے کہا’’ہمالیہ کے جغرافیائی طور پر پیچیدہ اور غیر مستحکم علاقے میں تعمیر کیا گیا چناب پل بنیادی ڈھانچے کے کارنامے سے کہیں زیادہ ہے… یہ ہندوستان کے حوصلے، جدت طرازی اور دور دراز علاقوں میں بھی ترقی لانے کے غیر متزلزل عزم کی علامت ہے‘‘۔
بیان میں کہا گیا ہے کہ دریائے چناب پر یہ پل صرف دو پہاڑوں کو نہیں جوڑتا بلکہ یہ جموں و کشمیر کے خوابوں، ترقی اور ایک نئے دور کو جوڑتا ہے۔
وزارت ریلوے کا کہنا ہے کہ دریائے چناب میں سلال ڈیم کے قریب ۱۳۱۵ میٹر پر پھیلا ہوا یہ پل۴۶۷میٹر پر محیط ہے اور۲۶۶ کلومیٹر فی گھنٹہ کی رفتار سے ہوا برداشت کر سکتا ہے۔
وزارت کے مطابق یہ پل اونچائی کے لحاظ سے ایفل ٹاور سے بھی زیادہ بلند ہے اور ندی کی سطح سے ریل کی سطح تک قطب مینار سے تقریبا پانچ گنا اونچا ہے۔
کمار نے کہا’’اس انجینئرنگ معجزے کی تعمیر میں۲۸ہزار میٹرک ٹن سے زیادہ اسٹیل شامل تھا اور ہندوستانی ریلوے میں اپنی نوعیت کا پہلا کیبل کرین سسٹم متعارف کرایا گیا تھا ، جس کا استعمال۹۱۵ میٹر چوڑی کھائی میں سامان لے جانے کیلئے کیا جاتا تھا۔
یہ پل اودھم پور،سرینگر،بارہمولہ ریل لنک (یو ایس بی آر ایل) پروجیکٹ کا ایک حصہ ہے اور یہ’’نہ صرف علاقے بلکہ امنگوں کو جوڑتا ہے۔ وادی کشمیر کو باقی ہندوستان سے ہر موسم میں، قابل اعتماد ریل روٹ سے جوڑتا ہے‘‘۔
وزارت نے دعویٰ کیا کہ یہ’’دنیا کا سب سے اونچا ریلوے پل‘‘ ہے جو ندی کے کنارے سے ۳۵۹ میٹر اوپر ہے۔ (ایجنسیاں)