نویگ ٹنل سڑک حادثے میں۲کی موت‘پونچھ میں تین زخمی

سرینگر//
جنوبی کشمیر کے قاضی گنڈ علاقے میں شاہراہ پر نویگ ٹنل کے قریب گذشتہ شام پیش آنے والے سڑک حادثے میں ایک اور زخمی کی موت واقع ہونے کے ساتھ ہی ہلاک شدگان کی تعداد۲ہوگئی۔
سرکاری ذرائع نے بتایا کہ نویگ ٹنل حادثے میں زخمیوں میں سے ایک زخمی گورنمنٹ میڈکل کالج اننت ناگ میں زخموں کی تاب نہ لاکر دم توڑ گیا۔
متوفی کی شناخت مشتاق احمد دلال ساکن شوپیاں کے طور پر کی گئی ہے ۔
قاضی گنڈ میں نویگ ٹنل کے قریب منگل کی شام قریب پونے نو بجے جموں سے سرینگر آ رہی ایک ہیکٹر گاڑی ڈرائیور کے قابو سے باہر ہوکر ایک ڈیوائڈر اور پولیس بیرئر سے ٹکرا گئی جس کے نتیجے میں ایک سپیشل پولیس افسر (ایس پی او) سمیت پانچ افراد شدید زخمی ہوگئے ۔
ذرائع نے بتایا کہ زخمیوں کو فوری طور پر ایمرجنسی ہسپتال قاضی گنڈ منتقل کیا گیا جہاں سے ان کو گورنمنٹ میڈیکل کالج اننت ناگ ریفر کیا گیا۔انہوں نے کہا کہ جی ایم سی اننت ناگ میں موجود ڈاکٹروں نے ایک زخمی کو مردہ قرار دیا جس کی شناخت زبیر احمد وانی ساکن شوپیاں کے طور پر کی گئی۔
پولیس نے اس ضمن میں پولیس اسٹیشن قاضی گنڈ میں بی این ایس کے متعلقہ دفعات کے تحت ایک مقدمہ درج کرکے مزید تحقیقات شروع کی ہے۔
قابل ذکر ہے کہ نویگ ٹنل میں قریب ایک ہفتہ قبل ایس آر ٹی سی کی ایک گاڑی پلٹنے کے نتیجے میں کم سے کم ۱۷مسافر زخمی ہوئے تھے ۔
اس دوران جموںکشمیر کے پونچھ ضلع کے گالی ناگ علاقے میں ٹریکٹر کو حادثہ پیش آیا جس کے نتیجے میں تین افراد شدید طورپر زخمی ہوئے ہیں۔
اطلاعات کے مطابق بدھ کے روز پونچھ کے گالی ناگ علاقے میں ٹریکٹر ڈرائیور کے قابوسے باہر ہو کر الٹ گیا جس وجہ سے ٹریکٹر میں سوار تین افراد زخمی ہوگئے ۔
معلوم ہوا ہے کہ آس پاس موجود لوگوں نے زخمیوں کو علاج ومعالجہ کی خاطر فوری طورپر نزدیکی ہسپتال منتقل کیا ۔
دریں اثنا پولیس نے معاملے کی نسبت کیس درج کرکے تحقیقات شروع کی ہے ۔