پونچھ میں اشتہاری ملزم کی غیر منقولہ جائیداد قرق

جموں//
جموں کشمیر کے پونچھ ضلع کے تحصیل منڈی علاقے میں پولیس نے ایک اشتہاری ملزم کی غیر منقولہ جائیداد کو قرق کیا ہے ۔
پولیس ذرائع کے مطابق منظور احمد ولد علی محمد، ساکن گاگرن، تحصیل منڈی کی غیر منقولہ جائیداد کو عدالتی حکم پر ضبط کیا گیا ہے ۔
ذرائع نے کہاکہ گرفتاری سے بچنے کے لیے وہ پاکستانی زیر قبضہ کشمیر فرار ہو گیا، جس کے بعد عدالت نے اسے اشتہاری ملزم قرار دیا۔
انہوں نے مزید بتایا کہ عدالتی حکم کی تعمیل میں پونچھ پولیس نے محکمہ مال کے اہلکاروں کے ہمراہ قانونی تقاضے پورے کرنے کے بعد کارروائی مکمل کی۔
یہ کارروائی قانون کی بالادستی کو یقینی بنانے اور مفرور ملزمان کو قانونی نتائج کا سامنا کرانے کے لیے پونچھ پولیس کی ثابت قدمی کی عکاسی کرتی ہے ۔
حکام نے اس عزم کا اعادہ کیا ہے کہ منظور احمد کو ہر صورت میں انصاف کے کٹہرے میں لانے کی کوششیں جاری رہیں گی۔
پولیس بیان کے مطابق اشتہاری مجرم کی جائیداد کی ضبطی مجرمانہ سرگرمیوں میں ملوث افراد کے لیے ایک سخت انتباہ ہے ، جو اس حقیقت کی تصدیق کرتا ہے کہ قانون بالآخر ان لوگوں کو پکڑ لے گا جو اس کی گرفت سے بچنے کی کوشش کرتے ہیں۔