بارہمولہ میں بھاری مقدار میں اسلحہ و گولہ بارود بر آمد:پولیس

سرینگر//
سیکورٹی فورسز نے شمالی کشمیر کے ضلع بارہمولہ کے نمبلان جنگلاتی علاقے میں بھاری مقدار میں اسلحہ و گولہ بارود بر آمد کیا ہے ۔
ایک پولیس ترجمان نے بتایا کہ بارہمولہ پولیس نے فوج کی۴۶آر آر اور سی آر پی ایف کی۵۳بٹالین کے ساتھ نمبلان جنگلاتی علاقے میں ایک مشترکہ تلاشی آپریشن چلایا۔انہوں نے کہا کہ تلاشی آپریشن کے دوران بھاری مقدار میں اسلحہ و گولہ بارود بر آمد کیا گیا۔
بر آمد شدہ اسلحہ و گولہ بارود میں دو چینی ہینڈ گرینیڈ، اے کے۴۷کی۱۰۴گولیاں‘اے کے۴۷کے دو میگزین (ایک تباہ شدہ)،آر ڈی ایکس کے۶ٹکڑے ،تار کے ساتھ ایک ڈیٹونیٹر سیٹ،ایک پوچ‘۲پٹھو بیگ اور ایک پریشر آئی ای ڈی شامل ہے ۔
پولیس ترجمان نے بتایا کہ سیکورٹی فورسز کی بروقت کارروائی نے غیر قانونی سرگرمیوں کیلئے ان ہتھیاروں اور گولہ بارود کے ممکنہ غلط استعمال کو روک دیا۔
ترجمان نے کہا کہ اس سلسلے میں انڈین آرمز ایکٹ کی دفعہ۲۵/۷؍اور یو اے پی اے کی دفعہ۱۳کے تحت پولیس اسٹیشن شیری میں ایک ایف آئی آر زیر نمبر۲۰۲۵/۱۸درج کیا گیا اور مزید تفتیش شروع کی گئی۔
ترجمان کا کہنا ہے کہ بارہمولہ پولیس امن کو لاحق کسی بھی خطرے کے خلاف فعال اقدامات کرتے ہوئے ضلع کی حفاظت اور سلامتی کو یقینی بنانے کیلئے پرعزم ہے ۔