کشمیر میں موسم خشک و خوشگوار‘۲۶مارچ تک موسم خشک رہے گا

سرینگر//
محکمہ موسمیات کی پیش گوئی کے عین مطابق وادی کشمیر میں موسم خشک و خوشگوار ہے اور موسم کی یہی صورتحال اگلے قریب۱۰دنوں کے دوران جاری رہنے کا امکان ہے ۔
متعلقہ محکمے کے ایک ترجمان نے بتایا کہ وادی میں۱۸مارچ سے۲۶مارچ تک موسم مجموعی طور پر خشک رہنے کا امکان ہے ۔انہوں نے کہا کہ۲۷اور۲۸مارچ کو پہاڑی علاقوں میں کہیں کہیں ہلکی برف باری یا بارشیں ہوسکتی ہیں۔
ان کا کہنا ہے کہ بعد ازاں۲۹ سے۳۱مارچ تک موسم ایک بار پھر عام طور پر خشک رہنے کا امکان ہے ۔
محکمے نے ایڈوائزری میں کسانوں سے کہا ہے کہ وہ اس دوران اپنے کھیت کھلیانوں اور باغوں میں اپنے کام جاری رکھ سکتے ہیں۔
ترجمان کے مطابق گذشتہ چوبیس گھنٹوں کے دوران جہاں وادی کے شبانہ درجہ حرارت میں بہتری واقع ہوئی ہے وہیں دن کے درجہ حرارت میں بھی اضافہ ریکارڈ ہوا ہے ۔
اس دوران وادی کے مشہور سیاحتی مقامات گلمرگ اور پہلگام میں شبانہ درجہ حرارت نقطہ انجماد سے نیچے درج ہوا ہے ۔
گلمرگ سرد ترین جگہ رہی ہے جہاں کم سے کم درجہ حرارت منفی۰ء۴ڈگری سینٹی گریڈ ریکارڈ کیا گیا جبکہ پہلگام میں شبانہ درجہ حرارت منفی۹ء۲ڈگری سینٹی گریڈ ریکارڈ ہوا ہے ۔
شمالی ضلع کپوارہ میں کم سے کم درجہ حرارت۰ء۱ڈگری سینٹی گریڈ ریکارڈ ہوا ہے ۔
دریں اثنا وادی میں منگل کی صبح سے مطلع صاف رہا اور دن بھر خوشگوار دھوپ چھائی رہی جس سے لوگوں کو مختلف مقامات جیسے پارکوں، صحنوں، دکان تھڑوں پر بیٹھے لطف اندوز ہوتے ہوئے دیکھا گیا۔
کسانوں کو بھی اپنے خاص طور پر سیب کے باغوں میں دوا پاشی اور دیگر ضروری کاموں کے ساتھ مشغول پایا گیا۔