اسمبلی الیکشن پر پہلا واضح اشارہ

سرینگر//(ویب ڈیسک)
جموں اور کشمیر میں اسمبلی انتخابات کیلئے ٹائم لائن کے پہلے اشارے میںوزیر دفاع راج ناتھ سنگھ نے جمعہ کو کہا کہ ’اس سال کے آخر تک‘ انتخابات منعقد ہونے کا امکان ہے۔
مہاراجہ گلاب سنگھ کی تاجپوشی کے۲۰۰ ویں سال کی خوشی میں جموں میں ایک تقریب سے خطاب کرتے ہوئے، وزیر دفاع نے کہا کہ حد بندی کی مشق مکمل ہو گئی ہے جس کے بعد نشستوں کی تعداد ۹۰ ہو گئی ہے‘ کشمیر میں ۴۷؍ اور جموں میں۴۳ نشستیں ہیں۔
راج ناتھ سنگھ، جو کہ مرکز کے زیر انتظام علاقے کے دو روزہ دورے پر ہیں، نے کہا’’اس سال کے آخر تک، جموں و کشمیر میں اسمبلی انتخابات کرانے کا امکان ہے‘‘۔
ٹائم لائن کا اشارہ الیکشن کمیشن کی جانب سے یونین ٹیریٹری میں انتخابی فہرستوں پر نظرثانی شروع کرنے اور ۳۱؍ اگست تک مسودہ فہرستیں تیار کرنے کے دو دن بعد سامنے آیا ہے۔
عہدیداروں کے مطابق چیف الیکشن کمشنر راجیو کمار اور الیکشن کمشنر انوپ چندر پانڈے نے جائزہ لیا اور جموں و کشمیر کے چیف الیکٹورل آفیسر کو ہدایت دی کہ وہ دوبارہ بنائے گئے اسمبلی حلقوں کا نقشہ تیار کریں۔
نظرثانی کی مشق کے دوران شہریوں کو انتخابی فہرستوں میں اپنی تفصیلات درج کرنے‘ حذف کرنے اور تبدیل کرنے کے مواقع فراہم کیے جائیں گے۔
وزیر دفاع نے کہا کہ حکومت جموں وکشمیر میں ایک اور مائیگریشن نہیں ہونے دے گی۔
ٹارگیٹ کلنگ کے بارے میں وزیر دفاع نے کہاکہ پڑوسی ملک کے اشاروں پر ہی کشمیر میں ٹارگیٹ کلنگ ہو رہی ہے۔انہوں نے بتایا کہ کشمیر میں پُر امن حالات کو درہم برہم کرنے کی کسی کو اجازت نہیں دی جائے گی۔اُن کے مطابق موجودہ حکومت نے جموںوکشمیر میں قیام امن کی خاطر زمینی سطح پر کوششیںکیں جس کے اب مثبت نتائج سامنے آرہے ہیں۔
جموںکشمیر کے لوگوں کو بھائی چارہ اور فرقہ وارانہ ہم آہنگی برقرار رکھنے کی اپیل کرتے ہوئے راج ناتھ سنگھ نے کہاکہ ہم ایک فیملی کی طرح رہتے ہیں ۔ انہوں بتایا کہ کچھ بڑی طاقتیں لوگوں کو تقسیم کرنے کی کوشش کر رہی ہیں لیکن اُن کے منصوبوں کو ناکام بنایا جائے گا۔ انہوں نے بتایا کہ بھدرواہ میں حال ہی میں نفرت کو بھڑکانے کی کوشش کی گئی جو کشمیریت کی سنسکرتی کے خلاف ہیں ۔اُن کے مطابق نفرت کے بیچ بو کر کوئی بھی ملک یا ریاست آگے نہیں بڑھ سکتی ہیں لہذا لوگوں سے اپیل ہے کہ وہ بھائی چارے کو مضبوط کریں۔
وزیر دفاع نے مزید بتایا کہ سال۱۹۴۷میں قبائیلی حملوں سے لے کر حال ہی میں ہو ئی ٹارگیٹ کلنگ ان سب کے پیچھے ایک بین الاقوامی سازش ہے اور لوگوں کو اس بات کی بخوبی علمیت ہے۔
سنگھ نے پاکستان کا نام لئے بغیر کہاکہ بھارت آگے بڑھ رہا ہے اور ہر شعبے میں ترقی کی بلندیوں کو چھو رہا ہے لیکن ہمسایہ ملک سازشوں میں مصروف ہے۔
وزیر دفاع کے مطابق ہمیں ہمسایہ ملک کی سازش کو ناکام بنانے کی ضرورت ہے ۔ انہوں نے کہاکہ جموں وکشمیر کا مستقبل بنانے کا کام یہاں کے عوام کو اپنے ہاتھوں سے ہی کرنا ہے۔ وزیر دفاع نے بتایا کہ ہندو ہو یا مسلمان یا کوئی اور فرقے کا شہری سرکار ایک او رمائیگریشن کی کسی بھی صورت میں اجازت نہیں دے گی۔