دہشت گردی کی تعریف کا مواد شیئر کرنے پر ۶ کیخلاف مقدمہ درج

سرینگر//
پولیس کا کہنا ہے کہ وسطی کشمیر کے ضلع بڈگام میں سوشل میڈیا پر جعلی اکائونٹس بنا کر دہشت گردی کو گلوریفائی کرنے پر چھ افراد کے خلاف مقدمے درج کئے گئے ہیں۔
ایک پولیس ترجمان نے بتایا کہ بڈگام میں پولیس نے سوشل میڈیا پلیٹ فارم کے غلط استعمال کو روکنے کے لیے سخت کارروائی انجام دیتے ہوئے جعلی اکاؤنٹس بنانے اور دہشت گردی کی تعریف میں مواد شیئر کرنے پر چھ افراد کے خلاف مقدمے درج کئے ہیں جس سے ممکنہ طور پر عوامی امن کو خراب ہوسکتا تھا۔
مذکورہ افراد کی شناخت ہلال احمد ڈار ساکن شولی پورہ،اویس احمد خان ساکن سویہ بگ دہر منہ، سہیل احمد شیخ ساکن بٹہ پورہ، عمر شفیع صوفی ساکن اوم پورہ، محمد عامر خان ساکن اچھ کوٹ اور شاہد میر ساکن شیخ پورہ چھتر ہامہ بڈگام کے طور پر کی گئی ہے ۔
بیان میں کہا گیا’’یہ افراد گمراہ کن اور غیر قانونی مواد کی تشہیر کے لیے جعلی سوشل میڈیا اکاؤنٹس کا استعمال کرتے ہوئے پائے گئے اور ان کے خلاف حفاظتی حراستی قوانین کے تحت قانونی کارروائی شروع کر دی گئی ہے ‘‘۔
جموں و کشمیر پولیس تمام سوشل میڈیا صارفین سے سختی سے تاکید کرتی ہے کہ وہ ذمہ داری سے کام لیں اور غیر قانونی، گمراہ کن یا خلل ڈالنے والا مواد پوسٹ کرنے یا شیئر کرنے سے گریز کریں۔
پولیس کا کہنا ہے کہ سوشل میڈیا گائیڈ لائنز کی خلاف ورزی کرنے والے کے خلاف قانون کے متعلقہ سیکشنز کے تحت سخت قانونی کارروائی کی جائے گی۔