سرکاری محکموں میں۳۲۴۷۴خالی آسامیاں‘۳۷۲۷ کوبھرتی بورڑوں کو بھیجا گیا: حکومت

جموں//
جموں و کشمیر حکومت نے منگل کو قانون ساز اسمبلی کو مطلع کیا کہ مختلف محکموں میں۳۲ہزار۴۷۴عہدے خالی ہیں۔
ایم ایل اے ہندواڑہ سجاد غنی لون کے سوال کے تحریری جواب میں چیف منسٹر عمر عبداللہ نے ایوان کو بتایا کہ۳۱ جنوری۲۰۲۵تک مختلف محکموں میں ۳۲ہزار۴۷۴ عہدے خالی ہیں۔
جواب کے مطابق۲۵۰۳گزیٹیڈ اسامیاں‘۱۹ہزار۲۱۴ نان گزیٹیڈ اسامیاں اور۱۰ہزار۷۵۷ملٹی ٹاسکنگ اسٹاف کی آسامیاں ہیں۔
حکومت کے مطابق۱۶؍اکتوبر ۲۰۲۴کو عمر عبداللہ کی قیادت والی منتخب حکومت کے حلف لینے کے بعد سے جموں و کشمیر سروس سلیکشن بورڈ اور پبلک سروس کمیشن کو ۳۷۲۷خالی آسامیوں کو بھیجا گیا ہے۔
ان میں سے۷۳۸گزیٹیڈ عہدے‘۱۷۵۴نان گزیٹیڈ عہدے اور۱۲۳۵ملٹی ٹاسکنگ سلاٹ ہیں۔
حکومت نے یہ بھی انکشاف کیا ہے کہ اس نے ایس ایس بی اور پی ایس سی کے ذریعہ منعقدہ بھرتی امتحانات میں شامل ہونے والے طلباء سے۱۷ء۱۴ کروڑ روپے کی امتحانی فیس وصول کی ہے۔
ایم ایل اے کے اس سوال کے جواب میں کہ کیا حکومت ملازمت کے خواہشمندوں کیلئے جاب درخواست فارم فیس دینے کا ارادہ رکھتی ہے ، حکومت نے کہا کہ حکومت ایسی کسی تجویز پر غور نہیں کررہی ہے۔
فی الحال حکومت میں ایسی کوئی تجویز زیر غور نہیں ہے۔