بارہمولہ میں خانہ کعبہ سے تشبیہ ڈھانچے کی تعمیر پر ایک شخص گرفتار:پولیس

سرینگر//
شمالی کشمیر کے ضلع بارہمولہ میں پولیس نے ایک شخص کو خانہ کعبہ سے مشابہ ڈھانچہ بنانے کی ویڈیو سوشل میڈیا پر وائرل ہونے کے بعد گرفتار کیا ہے ۔
گرفتار شدہ شخص کی شناخت عبدالرزاق لون ساکن واری پورہ کنزر کے طور پر ہوئی ہے جس کو عوامی غم و غصے کے بعد حراست میں لے لیا گیا۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ عبدالرزاق لون نے خانہ کعبہ سے مشابہ ایک ڈھانچہ تعمیر کیا تھا جس کو دوران شب مقامی لوگوں نے رضاکارانہ طور پر منہدم کر دیا۔
ترجمان نے کہا’’ابتدائی انکوائری سے معلوم ہوا کہ مذکورہ شخص ذہنی طور پر ٹھیک نہیں ہے لہذا اس کی قانونی طریقہ کار کے مطابق ضروری طبی جانچ کی جائے گی اور ایگزیکٹو مجسٹریٹ سے مطلوبہ احکامات حاصل کرنے کے بعد اسے نفسیاتی ہسپتال منتقل کیا جائے گا‘‘۔
پولیس نے ایک ایڈوائزری میں لوگوں سے اپیل کی ہے کہ وہ سوشل میڈیا یا کسی دوسرے پلیٹ فارم پر اس واقعہ کے متعلق افواہیں یا غلط معلومات پھیلانے سے گریز کریں۔
پولیس نے کہا’’غیر تصدیق شدہ معلومات کی گردش غیر ضروری تنائو اور حقائق کی غلط تشریح کا باعث بن سکتی ہے ‘‘۔
ترجمان نے کہا کہ افواہ پھیلانے یا بدامنی پھیلانے کی کوششوں میں ملوث پائے جانے والوں کے خلاف سخت قانونی کارروائی کی جائے گی۔
پولیس ترجمان نے کہا’’ہم تمام شہریوں سے امن، فرقہ وارانہ ہم آہنگی برقرار رکھنے اور قانون نافذ کرنے والے اداروں کے ساتھ تعاون کی درخواست کرتے ہیں‘‘۔
لوگوں سے اپیل کی گئی کہ وہ کسی بھی قسم کے خدشات یا مشتبہ سرگرمیوں کی اطلاع سرکاری چینلز کے ذریعے پولیس کو دیں۔