سنہا نے عام بجٹ کو متوسط طبقے کیلئے حوصلہ افزا قرار دیا

سرینگر//
جموںکشمیر کے لیفٹیننٹ گورنر منوج سنہا نے وزیر خزانہ نرملا سیتا رمن کے پارلیمنٹ میں پیش کئے گئے سال ۲۰۲۵۔۲۰۲۶کے مرکزی بجٹ کی ستائش کی اور اس کو متوسط طبقے کیلئے حوصلہ افزا قرار دیا۔
بتادیں کہ وزیر خزانہ نرملا سیتا رمن نے ہفتے کو پارلیمنٹ میں سال۲۰۲۵۔۲۰۲۶کے مرکزی بجٹ کو پیش کیا۔
منوج سنہا نے اس ضمن میں’ایکس‘پر ایک پوسٹ میں کہا’’میں وزیر خزانہ نرملا سیتا رمن جی کا وِکشت بھارت کے لیے ایک عملی بجٹ کے لیے تہہ دل سے شکریہ ادا کرتا ہوں‘‘۔
ایل جی نے کہا’’غریبوں، نوجوانوں، کسانوں اور خواتین کے لیے معیشت کو تیز رفتار اور جرأت مندانہ ترقیاتی اقدامات پر لانے کے لیے وزیر اعظم نریندر مودی جی کا بھی مشکور ہوں‘‘۔
لیفٹیننٹ گورنر نے اس بجٹ کو متوسط طبقے کیلئے حوصلہ افزا قرار دیتے ہوئے کہا’’ٹیکس کی شرح کا نظرثانی شدہ ڈھانچہ متوسط طبقے کی زندگیوں میں تبدیلی لانے کے لیے ایک تاریخی اقدام ہے ‘‘۔انہوں نے کہا’’وزیر اعظم نے کرایہ پر ٹی ڈی ایس کی حد اور سماجی تحفظ کو بڑھا کر اور گیگ اکانومی کو باضابطہ بنا کر ٹیکس دہندگان کو بھی بہت بڑی راحت فراہم کی ہے ‘‘۔
سنہا کا کہناتھا کہ سال۲۰۲۵۔۲۰۲۶کا بجٹ تیز رفتار ترقی اور نجی شعبے کی سرمایہ کاری کی حوصلہ افزائی کے لیے ہندوستان کی بڑھتی ہوئی خواہش کی عکاسی کرتا ہے اور ایگری ڈسٹرکٹ پروگرام سمیت مختلف اقدامات کے ساتھ زرعی ترقی پر توجہ، دیہی خوشحالی اور سماجی مساوات کے وژن کی ترجمانی کرنا ہے ۔
ایل جی نے کہا کہ ہندوستان تمام بڑی عالمی معیشتوں میں سب سے تیزی سے ترقی کرنے والا ملک ہے اور یہ بجٹ بنیادی ڈھانچے کے شعبے ،ایم ایس ایم ایز، توانائی کے شعبے ، اختراعات، روزگار کے مواقع کو مزید فروغ دے گا۔
سنہا نے کہا یہ بجٹ جامع اور پائیدار ترقی کے لیے کلیدی شعبوں میں تبدیلی کی اصلاحات کو آگے بڑھائے گا۔