اننت ناگ میںغیر مقامی سمیت۲منشیات فروش گرفتار:پولیس

سرینگر//
منشیات کے خلاف وسیع پیمانے پر جنگ کو جاری رکھتے ہوئے پولیس نے دو الگ الگ کارروائیوں کے دوران جنوبی کشمیر کے ضلع اننت ناگ میں دو منشیات فروشوں کو گرفتار کرکے ان کی تحویل سے ممنوعہ مواد بر آمد کیا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس اسٹیشن مٹن کو مصدقہ ذرائع سے اطلاع موصول ہوئی کہ ہلال احمد وانی ولد فاروق احمد وانی ساکن کرالہ گنڈ براہ مٹن منشیات کے مواد کی اسملگنگ کرتا ہے اور اس نے اپنے رہائشی مکان میں منشیات کی بھاری مقدار چھپا رکھی ہے ۔
ترجمان نے کہا کہ اطلاع کے مطابق اس ضمن میں پولیس اسٹیشن مٹن میں این ڈی پی ایس ایکٹ کے تحت ایک مقدمہ درج کرکے تحقیقات شروع کی گئی۔
بیان میں کہا گیا’’اننت ناگ پولیس اور متعلقہ ایگزیکٹو مجسٹریٹ کی ٹیم تشکیل دی گئی اور مذکورہ مکان کی تلاشی لی گئی‘‘۔
ترجمان نے کہا کہ تلاشی کے دوران مکان سے قریب۴کلو چرس پائوڈر بر آمد کی گئی جس کے بعد مالک مکان کو گرفتاری اور چرس کی ضبطی عمل میں لائی گئی۔بیان کے مطابق اس سلسلے میں مزید تحقیقات جاری ہے۔
پولیس ترجمان نے بتایا کہ ایک اور کارروائی کے دوران پولیس پوسٹ سنگم نے تولہ کھن کراسنگ کے نزدیک ایک ناکے کے دوران ایک شخص کو روکا۔انہوں نے کہا کہ تلاشی کے دوران اس کی تحویل سے ۱۴گرام برائون شوگر بر آمد کیا گیا جس کے بعد اس کو گرفتار کیا گیا۔
گرفتار شدہ کی شناخت صابر احمد شیخ ولد رونی شیخ ساکن دلی کے طور پر ہوئی ہے ۔
بیان میں کہا گیا کہ اس ضمن میں پولیس اسٹیشن بجبہاڑہ میں ایک کیس درج کرکے مزید تحقیقات شروع کی گئی۔انہوں نے کہا کہ اننت ناگ پولیس معاشرے سے منشیات کی بیخ کنی کیلئے پر عزم ہے ۔