۳مارچ سے جموں میں قانون ساز اسمبلی کا اجلاس طلب

سرینگر//
جموں کشمیر کے لیفٹیننٹ گورنر‘ منوج سنہا نے جموں کشمیر قانون ساز اسمبلی کا اجلاس۳مارچ۲۰۲۵کو جموں میں طلب کیا ہے ۔
اجلاس کا آغاز پیر کی صبح۱۰بجے ارکان اسمبلی سے لیفٹیننٹ گورنر کے خطاب کے ساتھ ہوگا۔
قانون ساز اسمبلی سیکرٹریٹ کی طرف سے جاری کردہ حکم نامے میں کہا گیا’’میں جموں و کشمیر یونین ٹریٹری کا لیفٹیننٹ گورنر منوج سنہا، جموں و کشمیر تنظیم نو ایکٹ،۲۰۱۹کی دفعہ (۱)۱۸کے تحت عطا کردہ اختیارات کا استعمال کرتے ہوئے جموں و کشمیر قانون ساز اسمبلی کا اجلاس۳مارچ بروز پیر۱۰بجے صبح جموں میں طلب کرتا ہوں‘‘۔
بتادیں کہ عمر عبداللہ کی زیر قیادت کابینہ نے گذشتہ ہفتے لیفٹیننٹ گورنر سے مارچ کے پہلے ہفتے میں اسمبلی اجلاس طلب کرنے کی سفارش کی تھی۔
تاہم جموں و کشمیر پیپلز کانفرنس کے صدر سجاد غنی لون نے رمضان کے مقدس مہینے کا حوالہ دیتے ہوئے اس پر اعتراض کیا تھا۔
لون نے کہا تھا کہ ماہ مارچ میں رمضان کا مقدس مہینہ چل رہا ہوگا لہذا اس مہینے میں اسمبلی اجلاس کا انعقاد بیشتر ارکان اسمبلی کیلئے تکلیف دہ ہوگا۔