بین ریاستی منشیات سمگلنگ کے ماڈیول کا پردہ فاش

سرینگر//
سرینگر پولیس نے ایک بین ریاستی منشیات سمگلنگ کے ماڈیول کا پردہ فاش کرکے دلی اور اتر پردیش سے ۲منشیات فروشوں کو گرفتار کیا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ سری نگر پولیس نے ایک کیس کی تحقیقات کرتے ہوئے بین ریاستی منشیات کی اسمگلنگ کے ایک بڑے نیٹ ورک کا پر دہ فاش کر دیا ہے ۔
ترجمان نے کہا’’بینک ٹرانزیکشنز اور کمیونیکیشن ریکارڈ سمیت تفتیش کے شواہد کی بنیاد پر بریلی اتر پردیش سے راجو گپتا اور بھجن پورہ دہلی سے محمد ابرار نامی دو اہم منشیات فروشوں کی شناخت مقامی منشیات فروشوں کو منشیات سپلائی کرنے کے بڑے ذرائع کے طور پر کی گئی‘‘۔
بیان میں کہا گیا کہ پولیس پوسٹ نورباغ کے ایس آئی امن دیپ سنگھ کی قیادت میں سری نگر پولیس کی ایک ٹیم نے مقامی پولیس کی مدد سے۱۰دنوں کے دوران اتر پردیش اور دہلی میں وسیع پیمانے پر آپریشن کیا۔
پولیس ترجمان نے کہا کہ راجیو گپتا کو۲۳جنوری۲۰۲۵کو بریلی میں جبکہ محمد ابرار کو۲۴جنوری۲۰۲۵کو بھجن پور میں گرفتار کیا گیا۔انہوں نے کہا کہ دونوں ملزموں کو متعلقہ عدالتوں میں پیش کیا گیا اور ٹرانزٹ ریمانڈ حاصل کرنے کے بعد دونوں اس وقت پولیس کی تحویل میں ہیں۔
بیان کے مطابق غازی آباد کے لونی میں ملزم سے منسلک ایک مشتبہ کورئیر پارسل کی شناخت کی گئی ہے اور عدالت کی منظوری سے اسے بازیافت کرنے کے لیے اقدامات کیے جا رہے ہیں۔
پولیس ترجمان نے کہا کہ این ڈی پی ایس ایکٹ کے تحت ممکنہ اٹیچمنٹ کے لیے ملزم کے مالی لین دین اور جائیدادوں کی جانچ کی جا رہی ہے ۔
پولیس ترجمان نے بتایا کہ یہ معاملہ۸نومبر ۲۰۲۴کو تربل چوک، سری نگر میں معمول کی پولیس ناکہ چیکنگ کے دوران شروع ہوا جب ایک موٹر سائیکل کو روکا گیا جس کے نتیجے میں اعزاز احمد گنائی (اتھواجن پانتھہ چوک)، اویس احمد گوجری (براڑی پورہ) اور میر رومان (علی مسجد عیدگاہ) نامی۳منشیات فروشوں کو گرفتار کرلیا گیا تھا۔
ترجمان نے کہا کہ پولیس نے کوڈین فاسفیٹ کی۱۴۰بوتلیں‘۳۸ہزار۵سو۳۰رویے منشیات کی مشتبہ رقم‘۳ موبائل فون اور ایک ڈرون کیمرہ ضبط کیا جو مبینہ طور پر منشیات کے خریداروں کی نگرانی کے لیے استعمال کیا جاتا تھا۔
ان کا کہنا تھا کہ اس معاملے کی تفتیش کے دوران سامنے آنے والے گذشتہ روابط نے پولیس کو دہلی اوراتر پردیش کے مذکورہ۲منشیات فروشوں تک پہنچایا۔
ترجمان نے کہا کہ اس ضمن میں مزید تحقیقات جاری ہیں اور آنے والے دنوں میں مزید گرفتاریاں اور ضبطیاں متوقع ہیں۔
بیان میں کہا گیا کہ سری نگر پولیس منشیات کے نیٹ ورک کو ختم کرنے اور معاشرے کی حفاظت کو یقینی بنانے کیلئے پرعزم ہے ۔