اننت ناگ میں منشیات فروش کی جائیداد ضبط:پولیس

سرینگر//
منشیات فروشوں کے خلاف کریک ڈائون کو جاری رکھتے ہوئے پولیس نے جنوبی کشمیر کے ضلع اننت ناگ میں ایک بدنام زمانہ منشیات فروش کی لاکھوں روپے مالیت کی جائیداد کو منسلک کر دیا ہے ۔
منشیات فروش کی شناخت غلام حسن بانڈرو عرف قاسم ولد ولی محمد ساکن سوتکی پورہ کے طور پر کی گئی ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ اننت ناگ پولیس نے منشیات سمگلنگ کے خلاف کریک ڈائون کو جاری رکھتے ہوئے ایک منشیات فروش کی۵۰لاکھ روپے مالیت کی جائیداد کو منسلک کر دیا۔
منشیات فروش کی شناخت غلام حسن بانڈرو عرف قاسم ولد ولی محمد ساکن سوتکی پورہ کے طور پر کی گئی ہے ۔انہوں نے کہا کہ یہ کارروائی پولیس اسٹیشن سری گفوارہ نے منشیات کی لعنت سے نمٹنے کیلئے جاری تیز کوششوں کے ایک حصے کے طور پر انجام دی ہے ۔
بیان میں کہا گیا’’ملزم، جو ایک عادی مجرم ہے ، کی منشیات کی اسمگلنگ میں ملوث ہونے کی اس کی ایک ہسٹری ہے اور اس کو این ڈی پی ایس ایکٹ کے تحت متعدد مقدمات میں ملوث پایا گیا ہے اور پولیس اسٹیشن سری گفوارہ میں اس کے خلاف ایف آئی آر زیرنمبر۲۰۱۴/۰۴؍اور۲۰۲۱/۷۴درج ہیں‘‘۔
ترجمان نے کہا کہ یہ معاملات غیر قانونی سرگرمیوں کے ذریعے سماجی بہبود کو نقصان پہنچانے کی اس کی بار بار کوششوں کو واضح کرتے ہیں۔
پولیس ترجمان نے بتایا کہ جائیداد کی ضبطی سے منشیات کے غیر قانونی کاروبار میں ملوث افراد کو ایک مضبوط پیغام جاتا ہے کہ ایسی سرگرمیوں کو برداشت نہیں کیا جائے گا۔
اس دوران پولیس نے سری نگر میں منشیات کے کاروبار سے حاصل کی گئی دو منشیات فروشوں کی ایک گاڑی کوضبط کیا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ سرینگر پولیس نے دو منشایت فروشوں کی منشیات کاروبار سے حاصل کی گئی ایک گاڑی کو ضبط کیا ہے ۔انہوں نے ان منشیات فروش کی شناخت آصف احمد شیخ اور عارف احمد شیخ ساکنان بابا پپورہ برتھنہ کے طور پر کی ہے ۔
بیان میں کہا گیا کہ دونوں ملزمین کو این ڈی پی ایس ایکٹ۲۰/۸کے تحت پولیس اسٹیشن پارمپورہ میں درج ایف آئی آر نمبر۲۰۲۴/۱۳۶کے تحت گرفتار کیا گیا ہے اور جرم میں استعمال ہونے والی گاڑی کو بھی ضبط کیا گیا ہے ۔
پولیس ترجمان نے بتایا کہ کیس کی مالی تحقیقات کے دوران یہ بات سامنے آئی ہے کہ یہ گاڑی ان ملزمان کی جانب سے منشیات کی غیر قانونی تجارت سے حاصل کی گئی تھی۔انہوں نے کہا کہ گاڑی کی ضبطی این ڈی پی ایس کے ۶۸؍ایکٹ کے تحت عمل میں لائی گئی ہے ۔