آر ٹی سی گاڑیوں کوشہر ی حدود کے باہر ہی روکنے سے مالی نقصان

سرینگر//
جموں کشمیر روڈ ٹرانسپورٹ کارپوریشن (ایس آر ٹی سی)نے حکام سے کہا ہے کہ مسافروں کی سہولیات اور محکمے کو نقصان سے بچانے کیلئے ایس آر ٹی سی گاڑیوں کو سری نگر میں چلنے اجازت دیں۔
اطلاعات کے مطابق جموںکشمیر روڈ ٹرانسپورٹ کارپویشن نے حکام پر زور دیا کہ وہ سرینگر کے حدود میں ایس آر ٹی سی بسوں کو چلنے کی اجازت دیں تاکہ مسافروں کو کسی قسم کی مشکلات کا سامنا نہ کرناپڑے ۔
آر ٹی سی کے منیجنگ ڈائریکٹر(یم ڈی) نے آئی جی کشمیر کو ایک خط تحریر کیا جس میں درخواست کی گئی کہ متعلقہ حکام کو ہدایت دیں کہ وہ ایس آر ٹی سی بسوں کو سری نگر کے حدود میں چلنے کی اجازت دیں ۔
ایم ڈی نے مزید کہاکہ سال ۲۰۲۱سے یہ بسیں سری نگر حدود میں چل رہی تھیں لیکن اچانک انہیں شہر کے حدود میں آنے سے روکا گیاجس وجہ سے کارپوریشن کو لاکھوں کا نقصان اٹھانا پڑ رہا ہے ۔
آر ٹی سی نے الزام لگایا ہے کہ۴نومبر کو سری نگر میں جموں کشمیر قانون ساز اسمبلی کے اجلاس کے آغاز پر ایس آر ٹی سی کی بسوں کو سری نگر شہر میں داخل ہونے کی اجازت نہیں دی گئی۔
ایم ڈی نے کہا کہ پولیس کی جانب سے شمالی کشمیر کی بسوں کو بمنہ بائی پاس اور جنوبی کشمیر کی بسوں کو پانتھ چوک پر روکا جا رہا ہے جس کی وجہ سے نہ صرف عام لوگوں کو خاصی مشکلات کا سامنا کرنا پڑ رہا ہے بلکہ محکمے کو بھی ناقابل تلافی مالی نقصان سے دوچار ہونا پڑ رہا ہے ۔انہوں نے خط میں مزید لکھا کہ کارپویشن نے ۲سو کروڑ روپے میں۶۵۵گاڑیاں جن میں بسیں اور ٹرکیں شامل ہیں کو خریدلیں جن میں سے۱۲۵بسوں کو کشمیر صوبے کے لئے مختص رکھا گیا۔
ان کے مطابق ان بسوں کے ذریعے مسافروں کو نہ صرف وقت مقررہ کے اندرا ندر منزل مقصود تک پہنچایا جاتا ہے بلکہ لوگوں کو بھی سفر کرنے میں آسانی ہوئی۔
خط میں مزید لکھا گیا کہ۴نومبر۲۰۲۴جب سری نگر میں اسمبلی اجلاس شروع ہوا تب سے ان بسوں کو سری نگر کے حدود میں آنے جانے کی اجازت نہیں دی جارہی ہے ۔
ایم ڈی نے کہاکہ جنوبی کشمیر سے آنے والی بسوں کو پانتھ چوک میں اور شمالی کشمیر کی بسوں کو بمنہ بائی پاس پر روکا جارہا ہے جس وجہ سے مسافروں، ملازمین اور طلبا کو شدید ترین مشکلات کاسامنا کرناپڑ رہا ہے ۔
خط کے متن میں لکھا گیا کہ ان بسوں کے ذریعے کارپوریشن کو یومیہ آٹھ لاکھ روپے کی آمدنی ہوتی تاہم جب سے گاڑیوں کو سرینگر کے داخلی راستوں پر روکا گیا تب سے محکمہ کو یومیہ چار لاکھ روپے کا نقصان ہو رہا ہے ۔
آر ٹی سی کے منیجنگ ڈائریکٹر نے آئی جی کشمیر سے مودبانہ اپیل کی ہے کہ مسافروں کی مانگ اور محکمہ کے نقصان کو دیکھتے ہوئے یس آر ٹی سی بسوں کو سری نگر حدود میں آنے کی اجازت دی جائے تاکہ عام لوگوں کو مزید مشکلات کا سامنا کرنے پر مجبور نہ ہونا پڑے ۔