بارہمولہ:منشیات فروش کی۷۲ء۱کروڑ روپے مالیت کی جائیداد ضبط:پولیس

سرینگر//
منشیات فروشوں کے خلاف کارروائیوں کو جاری رکھتے ہوئے پولیس نے شمالی کشمیر کے ضلع بارہمولہ میں ایک بدنام زمانہ منشیات فروش کی۷۲ء۱کروڑ روپے مالیت کی جائیدادوں کو ضبط کیا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ بارہمولہ پولیس نے رفیق احمد خان عرف رفیع رفہ ولد غلام حسن ساکن ترکنجن بونیار بارہمولہ کی ایک کروڑ ۷۲لاکھ روپے مالیت کی جائیدادوں کو ضبط کیا ہے ۔
بیان کے مطابق ضبط شدہ جائیدادوں میں چوڈھی جموں اور ترکانجن بونیار میں دو منزلہ رہائشی مکانات، ٹپر، ٹریلر اور ایک اسکارپیو گاڑی شامل ہے ۔انہوں نے کہا کہ یہ کارروائی پولیس اسٹیشن گنگیال میں این ڈی پی ایس کی متعلقہ دفعات کے تحت درج ایف آئی آر نمبر۲۰۱۶/۱۳۴کے تحت انجام دی گئی۔
ترجمان نے کہا کہ پولیس کی طرف سے کی گئی تفتیش کے دوران جائیدادوں کی نشاندہی غیر قانونی طور پر حاصل کی گئی جائیدادوں کے طور پر کی گئی۔انہوں نے کہا کہ یہ جائیدادیں منشیات فروشوں کی جانب سے منشیات اور سائیکو ٹراپک مواد کی غیر قانونی اسمگلنگ سے حاصل کی گئیں۔