سیاحتی مقام گلمرگ اور وادی گریز میں تازہ برف باری

سرینگر//
شمالی کشمیر میں واقع سیاحتی مقام گلمرگ کو ہفتے کی صبح برف کی مہین سی چادر نے اپنی لیٹ میں لے لیا جس نے اس قطعہ اراضی کی خوبصورتی کو مزید دو بالا کر دیا۔
ادھر شمالی کشمیر کی وادی گریز میں بھی ہفتے کی صبح تازہ برف باری ہوئی۔
محکمہ موسمیات نے وادی میں دو پہر کے بعد موسم میں بہتری واقع ہونے کی پیش گوئی کی ہے ۔
ذرائع نے بتایا کہ گلمرگ میں ہفتے کی صبح برف باری ہو رہی تھی اور کم سے کم ایک انچ برف زمین پر جمع ہوئی تھی۔
تازہ برف باری نے اس قطعہ اراضی کے تمام میدانوں، بالائی حصوں اور درختوں کو اپنی لپیٹ میں لے لیا۔اس دوران وہاں موجود مقامی و غیر مقامی سیاح اس تازہ برف باری سے لطف اندوز ہو رہے تھے ۔
سیاحوں کا کہنا ہے کہ ایسا لگتا ہے کہ اس جگہ نے سفید چادر اوڑھ لی ہے جس سے اس کے مناظر مزید قابل دید ہوئے ہیں۔
دریں اثنا تازہ برف باری سے وادی میں سردی کی شدت مزید تیز ہوئی ہے ۔
سیاحتی مقام گلمرگ میں شبانہ درجہ حرفارت نقطہ انجماد سے نیچے درج ہوا ہے اور وہاں شبانہ درجہ حرارت منفی۵ء۰ڈگری سینٹی گریڈ ریکارڈ ہوا ہے ۔
سرینگر میں کم سے کم درجہ حرارت۶ء۴ڈگری سینٹی گریڈ جبکہ سرحدی ضلع کپوارہ میں شبانہ درجہ حرارت۰ء۵ڈگری سینٹی گریڈ اور سیاحتی مقام پہلگام میں کم سے کم درجہ حرارت ۳ء۰ڈگری سینٹی گریڈ ریکارڈ ہوا ہے ۔
محکمہ موسمیات کے ایک ترجمان مطابق وادی میں ۱۶نومبر کی دو پہر کے بعد موسم میں بہتری واقع ہونے کا امکان ہے ۔انہوں نے کہا کہ وادی میں۱۷سے۲۳نومبر تک موسم مجموعی طور پر خشک رہ سکتا ہے جبکہ۲۴نومبر کو موسم ایک بار پھر کروٹ بدل سکتا ہے جس کے نتیجے میں میدانی علاقوں میں ہلکی بارشیں جبکہ پہاڑی علاقوں میں کہیں کہیں ہلکی برف باری ہوسکتی ہے ۔
ترجمان کا کہنا ہے کہ بعد ازاں وادی میں ماہ رواں کے اختتام تک موسم خشک رہنے کا ہی امکان ہے ۔
محکمے نے اپنی ایڈوائزری میں سیاحوں اور مسافروں سے کہا ہے کہ وہ موسمی صورتحال کے پیش نظر اپنے سفر کا منصوبہ بنائیں ۔
اس دوران جنوبی کشمیر کے ضلع شوپیاں کو صوبہ جموں کے راجوری اور پونچھ اضلاع کے ساتھ جوڑنے والے تاریخی مغل روڈ پر تازہ برف باری کے باعث ٹریفک کی نقل و حمل بند ہے ۔
تاہم وادی کو ملک کے باقی حصوں کے ساتھ جوڑنے والی سرینگر،جموں قومی شاہراہ پر ٹریفک دو طرفہ نقل و حمل حسب معمول جاری ہے ۔
ٹریفک حکام نے بتایا کہ برف جمع ہونے کی وجہ سے مغل روڈ پر ٹریفک بند کر دیا گیا ہے ۔انہوں نے کہا وادی کو ملک کے باقی حصوں کے ساتھ جوڑنے والی سرینگر،جموں قومی شاہراہ پر ٹریفک دو طرفہ نقل و حمل حسب معمول جاری ہے ۔
تاہم حکام نے قومی شاہراہ پر سفر کرنے والوں سے لین ڈسپلن پر عمل کرنے کی تاکید کی ہے ۔انہوں نے لوگوں سے کہا ہے کہ وہ رام بن اور بانہال کے درمیان مٹی کے تودے گر آنے اور چٹانیں کھسکنے کے خطرات کے پیش نظر اس شاہراہ پر دن کے دوران ہی سفر کریں۔
حکام نے بتایا کہ وادی کو لداخ یونین ٹریٹری سے جوڑنے والی سرینگر، لیہہ شاہراہ اور بھدرواہ، چمب روڈ پر ٹریفک حسب معمول چل رہا ہے ۔