کشمیر کے زعفران کی مانگ میں اضافہ کے بیچ کاشتکار بارشوں کے منتظر

سرینگر//
زعفران کی بڑھتی ہوئی مانگ کے بیچ امسال مسلسل خشک موسم اور آبپاشی کی ناکافی سہولیات کی وجہ سے اس سال کی پیداوار میں نمایاں کمی دیکھی گئی ہے ۔
ڈائریکٹر زراعت چوہدری محمد اقبال نے کہا کہ۱۰؍اور۱۱نومبر کے دوران محکمہ موسمیات کی ممکنہ بارشوں کی پیش گوئی کے پیش نظر پیداوار میں اضافہ ہو سکتا ہے کیونکہ زعفران کے پھولوں کو اٹھانے کا سلسلہ۱۵نومبر تک جاری رہے گی۔
جنوبی کشمیر کے زعفران کی فصل کیلئے مشہور قصبہ پامپور اور ملحقہ علاقوں میں ان دنوں کاشتکار مرد زن زعفران کے پھول اٹھانے کے کام میں انتہائی مصروف ہیں۔
تاہم ملکی و بین الاقوامی خریداروں کی طرف سے بڑھتی ہوئی مانگ کے پیش نظر کم پیداوار کاشتکاروں کے لئے ایک بہت بڑا چیلنج بن گیا ہے ۔
زعفران ایسو سی ایشن کشمیر کے چیئرمین‘ عبدالمجید وانی نے یو این آئی کو بتایا’’ملکی و بین الاقوامی سطح پر کشمیر کے زعفران کے لئے مانگ کافی بڑھ گئی ہے ‘‘۔انہوں نے کہا کہ بڑی کمپیناں جیسے کرناٹک کی جینتی ہربز اینڈ سپیشیز اس میں کافی دلچسپی لے رہی ہیں۔
وانی نے کہا’’یہ کمپنی جو پہلے ایران سے زعفران منگواتی تھی، اب کشمیر کے زعفران کے معیار اور جی آئی ٹیگ کو دیکھ کر ہم سے بھاری مقدار میں زعفران خریدنا چاہتی ہے ‘‘۔انہوں نے مزید کہا کہ کمپنی کے ساتھ معاہدہ جلد طے پانے کا امکان ہے ۔
جی آئی (جغرافیائی اشارے ) ٹیگ، جو کشمیر کے زعفران کی پاکیزگی اور اصلیت کی تصدیق کرتی ہے سے ، مانگ کافی بڑھ گئی ہے ۔
پانپور کے کشمیری زعفران پارک میں زیادہ تر اسٹاک پہلے ہی کمپنیوں اور انفرادی خریداروں کے ذریعہ مسابقتی قیمتوں پر بُک کیا جا چکا ہے ۔ وانی نے کہا’’کئی کمپنیوں نے اس سال کی فصل کیلئے پہلے ہی بُکنگ کی ہے بلکہ کچھ کمپنیاں ساری فصل خریدنا چاہتی ہیں‘‘۔
وانی نے کہا’’تقریباً۳۰سے۴۰ملکی اور بین الاقوامی سطح کے بڑے خریدار، ، فی الحال کشمیر سیفرون پارک کے ساتھ رجسٹرڈ ہیں‘‘۔ان کا اندازہ ہے کہ موجودہ بکنگ کے پیش نظراس موسم میں تقریباً۵۰سے۱۰۰کلوگرام زعفران ان خریداروں میں تقسیم کیا جا سکتا ہے ۔
زعفران ایسو سی ایشن کشمیر کے چیئرمین نے کہا کہ گزشتہ سال سے جی آئی ٹیگ کی حکمت عملی، جس میں کشمیر کے زعفران کو فروغ دینے کے لیے ملک بھر میں تھوڑی مقدار میں فروخت کرنا شامل تھا، مصنوعات کے معیار کے بارے میں بیداری اور تعریف کو بڑھانے میں کامیاب ثابت ہوئی۔
وانی نے امید ظاہر کی کہ نئی حکومت زعفران کھیتوں کی آبپاشی کے لئے اقدام کو ترجیح دے گی۔انہوں نے کہا’’ہم نے متعلقہ رکن اسمبلی کے ساتھ یہ مسئلہ اٹھایا ہے اور ہم امید کرتے ہیں اس کو ترجیح دی جائے گی۔‘‘