ہندوستان نے اقوام متحدہ کے اداروں میں اصلاحات پر زور دیا

نئی دہلی//ہندوستان نے بین الاقوامی لیبر آرگنائزیشن سمیت اقوام متحدہ کے تمام اداروں میں اصلاحات پر زور دیتے ہوئے کہا ہے کہ اس سے عالمی سطح پر سماجی انصاف اور پائیدار و جامع ترقی کو فروغ دینے کا مشترکہ وژن یقینی ہوگا۔
مرکزی وزارت محنت اور روزگار میں سکریٹری سمیتا ڈاورا نے انٹرنیشنل لیبر آرگنائزیشن کی 352ویں گورننگ باڈی میٹنگ سے خطاب کرتے ہوئے کہا کہ بین الاقوامی لیبر آرگنائزیشن اقوام متحدہ کے تمام اداروں میں ہندوستان اصلاحات کی وسیع پیمانے پر حمایت کرتا ہے ۔
بین الاقوامی تنظیم کی میٹنگ 28 اکتوبر سے 7 نومبر تک سوئٹزرلینڈ کے شہر جنیوا میں منعقد ہو رہی ہے ۔ ہندوستانی وفد کی قیادت محترمہ سمیتا ڈاؤرا کر رہی ہیں۔
وزارت نے ہفتہ کو یہاں کہا کہ جمہوریت کاری کی تجویز پر بحث میں ہندوستان نے بین الاقوامی لیبر آرگنائزیشن کی تعریف کی اور اقوام متحدہ کے مختلف اداروں میں اصلاحات پر زور دیا۔
ہندوستان نے کہا کہ ایک جامع نقطہ نظر اس بات کو یقینی بنائے گا کہ اقوام متحدہ کے ادارے عالمی سطح پر سماجی انصاف اور پائیدار اور جامع ترقی کو فروغ دینے کے مشترکہ وژن کو پورا کرنے کے لیے مزید ہم آہنگی سے کام کریں۔ ہندوستان نے کہا کہ آبادی اور افرادی قوت کو مدنظر رکھتے ہوئے جغرافیائی تنوع بین الاقوامی لیبر آرگنائزیشن کے اندر زیادہ مساوی اور متوازن جغرافیائی نمائندگی کے لیے رہنما اصول ہونا چاہیے ۔
دیگر بات چیت کے دوران، محترمہ ڈاؤرا نے جامع اقتصادی پالیسیوں کی اہمیت پر زور دیا۔ انہوں نے کہا کہ معیاری ملازمتوں کی تخلیق، سماجی تحفظ اور صنفی مساوات کو فروغ دیا جانا چاہئے ۔ ہندوستان میں سماج کے تمام طبقات بالخصوص خواتین اور نوجوانوں کے لیے اچھے کام کے مواقع پیدا کرنے کی کوششیں کی گئی ہیں۔