گگن گیر حملہ :ایل جی سنہا کی صدارت میں کشمیر کی سکیورٹی حال کا جائزہ

سرینگر//
لیفٹیننٹ گورنرمنوج سِنہانے آج راج بھون میں صوبہ کشمیر میں سیکورٹی صورتحال پر ایک جائزہ میٹنگ منعقد کی۔
ایک سرکاری بیان میںکہا گیا ہے کہ لیفٹیننٹ گورنر نے جموں کشمیر پولیس اَفسران سے کہا کہ وہ بنیادی ڈھانچے کے اہم پروجیکٹوں اور مزدوروں کی حفاظت کے لئے تعمیراتی کیمپوں کے اِرد گرد سیکورٹی گرڈ کو سخت کرنے کے لئے اقدامات کو یقینی بنائیں۔
سنہا نے منصوبے پر عمل درآمد کرنے والی ایجنسیوںکے ساتھ باقاعدگی سے کوآرڈی نیشن میٹنگوں کے لئے میکانزم کے قیام پر زور دیا۔
ایل جی نے پولیس کو ہدایت دی کہ وہ بنیادی ڈھانچے کے منصوبوں کا سیکورٹی آڈِٹ کرے، سٹریٹجک پوائنٹس پر چوبیس گھنٹے ناکے لگائے جائیں، نائٹ پٹرولنگ اور علاقے کے تسلط کا جائزہ لیں۔ اُنہوں نے کہا کہ پولیس کو دہشت گردی کے خاتمے کیلئے فوج اور دیگر سیکورٹی ایجنسیوں کے ساتھ مل کر مضبوط سیکورٹی اور انٹلی جنس گرڈ کو یقینی بنانا ہوگا۔
لیفٹیننٹ گورنر نے کہا کہ دہشت گردوں کی مدد کرنے والے اور ان کی حوصلہ افزائی کرنے والوں سمیت دہشت گردی کے پورے ماحولیاتی نظام کو مکمل طور پر ختم کرنے کی ضرورت ہے۔
یاد رہے کہ اتوار کو مشتبہ ملی ٹنٹوں نے گگن گیر میں ایک سرنگ پر کام کررہے غیر مقامی مزدوروں پر فائرنگ کے سات افراد کو ہلاک کیا جن میں بڈگام ضلع کا ایک ڈاکٹر بھی شامل ہے ۔
میٹنگ میں ڈائریکٹر جنرل آف پولیس نلین پربھات،پرنسپل سیکرٹری محکمہ داخلہ چندرکر بھارتی ، ایڈیشنل ڈائریکٹر جنرل آف پولیس (لأ اینڈ آرڈر) وِجے کمار، ایڈیشنل ڈائریکٹر جنرل پولیس سی آئی ڈی نتیش کمار، انسپکٹر جنرل آف پولیس کشمیر ودھی کمار بردی، لیفٹیننٹ گورنر کے پرنسپل سیکرٹری ڈاکٹر مندیپ بھنڈاری ،صوبائی کمشنر کشمیر وِجے کمار بدھوری اور جموں و کشمیر پولیس کے دیگر سینئر افسران نے شرکت کی۔