وزیر اعلیٰ عمرعبداللہ کی دہلی میں وزیر داخلہ سے ملاقات

نئی دہلی/ 23 اکتوبر
جموں کشمیر کے نو منتخب وزیر اعلیٰ عمر عبداللہ نے بدھ کو مرکزی وزیر داخلہ امت شاہ سے ملاقات کی اور ریاست کا درجہ جلد بحال کرنے سمیت مرکز کے زیر انتظام علاقے سے متعلق امور پر تبادلہ خیال کیا۔
گزشتہ ہفتے عہدہ سنبھالنے کے بعد قومی راجدھانی کے اپنے پہلے دورے میں عبداللہ نے وزیر داخلہ کے ساتھ تقریباً 30 منٹ گزارے۔
ملاقات کے بعد عمرعبداللہ نے کہا کہ یہ ایک خیر سگالانہ ملاقات تھی جس کے دوران انہوں نے مرکزی وزیر داخلہ کو صورتحال سے آگاہ کیا اور ریاست کا درجہ بحال کرنے کے معاملے پر بھی تبادلہ خیال کیا۔
وزیر اعلیٰ ۔وزیر اعظم مودی کے علاوہ این ڈی اے حکومت کے کئی دیگر وزرائ‘ لیڈران سے بھی ممکنہ طور ملاقات کریں گے۔
نیشنل کانفرنس (این سی) ذرائع کے مطابق وزیر اعلیٰ عمر عبداللہ وزیر داخلہ امیت شاہ اور وزیر اعظم نریندر مودی سے ملاقات کرنے دہلی پہنچ چکے ہیں تاہم وزیر اعظم برکس کانفرنس کے سلسلے میں اس وقت روس میں ہیں اور آئندہ کل وہ دہلی واپس لوٹ رہے ہیں اور عمر عبداللہ ممکنہ طور پر کل مودی سے ملاقات کریں گے۔
این سی ذرائع کا کہنا ہے کہ وزیر اعلیٰ کی سربراہی میں منعقد ہوئی حالیہ کابینہ میٹنگ کے دوران جموں کشمیر کا ریاستی درجہ بحال کرنے سے متعلق قرارداد پاس کی تھی۔
کابینہ کی جانب سے پاس کی گئی قرارداد پر جموں کشمیر کے لیفٹیننٹ گورنر منوج سنہا نے بھی اپنی مہر ثبت کر دی اور اسے اعلیٰ حکام کو روانہ کیا۔
یونین ٹیریٹری جموں کشمیر کی پہلی کابینہ میں ریاستی درجہ کی قراردار پاس کیے جانے جبکہ دفعہ۳۷۰سے متعلق ”پر اسرار“ خاموشی اختیار کیے جانے پر کشمیر کے سیاسی رہنماو¿ں نے این سی حکومت کو سخت تنقید کا نشانہ بنایا۔
اپوزیشن لیڈران کے مطابق نیشنل کانفرنس نے اپنی انتخابی تشہیری مہم میں دفعہ ۳۷۰کی بحالی سے متعلق جدو جہد جاری رکھنے کا وعدہ کیا تھا تاہم پہلی ہی کابینہ میٹنگ میں دفعہ۳۷۰کو این سی نے فراموش کر دیا۔