’ صحافیوں کے ایک دوسری ریاستوں کے دوروں سے ملک کے جمہوری ڈھانچے کو مضبوط بنانے میں مدد ملتی ہے‘

حیدر آباد/۲۳اکتوبر(ہارون رشید شاہ)
تلنگانہ کے گورنر ‘جیشنو دیو ورمانے کہا ہے کہ صحافیوں کے ایک دوسری ریاستوں کے دوروں سے ملک کے جمہوری ڈھانچے کو مضبوط بنانے میں مدد ملتی ہے ۔
جموں کشمیر کے میڈیا وفد نے آج راج بھون میں گورنر ورما سے ملاقات کی۔
میڈیا کے وفد کا خیرمقدم کرتے ہوئے گورنر ورما نے کہا کہ تلنگانہ ایک ایسی ریاست ہے جو ثقافت ، ورثہ ، آرٹ اور دستکاری سے مالا مال ہے۔ انہوں نے کہا کہ حیدرآباد کی صنعت کاری اور ترقی اہم کامیابیاں ہیں۔
صحافیوں کےلئے اس طرح کے دوروں کے انعقاد میں پی آئی بی کے اقدامات کو سراہتے ہوئے گورنر ورما نے کہا ”مواصلات اور ہائی پروفائل صحافت کے آج کے دور میں ، اس طرح کے دورے بہت اہم ہیں۔ حکومت کے بہترین طریقوں کا مشاہدہ کرنے کےلئے اضلاع کا دورہ کرنا اور ان مشاہدات کو ان کی متعلقہ ریاستوں میں واپس لے جانے سے ہمارے جمہوری ڈھانچے کو مضبوط بنانے میں مدد ملتی ہے“۔
تلنگانہ کے گورنر نے صحافیوںکو بتاےا کہ وہ ریاست کے عام لوگوں سے بھی ملےں اور ان کی اچھی باتوں اور تجربوں کو اپنے علاقوں میں تشہیر دیں اور اپنے جموں کشمیر کے بارے میں اپنے تاثرات یہاں کے لوگوں کے ساتھ شےئر کریں ۔
گورنر ورما نے جموں کشمیر میں مرکزی حکومت کے اقدامات کا ذکر کرتے ہو ئے کہا کہ وزیر اعظم مودی کی قیادت والی حکومت کے’ ایک بھارت، شریشٹھ بھارت‘ پروگرام کا مقصد مختلف ریاستوں / مرکز کے زیر انتظام علاقوں کے لوگوں کے درمیان باہمی تعامل کو بڑھانا اور باہمی تفہیم کو فروغ دینا ہے۔
ان کاکہنا تھا کہ ریاستیں زبان سیکھنے، ثقافت، روایات اور موسیقی، سیاحت اور کھانوں، کھیلوں اور بہترین طریقوں کے اشتراک وغیرہ کے شعبوں میں پائیدار اور منظم ثقافتی رابطے کو فروغ دینے کےلئے سرگرمیاں انجام دیتی ہیں۔
جموںکشمیر کے مختلف اخبارات کے تقریبا ًبارہ صحافی پریس انفارمیشن بیورو کے زیر اہتمام تلنگانہ کے دورے پر ہیں، جس میں ایک ریاست کے صحافیوں کو زمینی سطح پر حکومت کی پالیسیوں اور پروگراموں کے نفاذ کو سمجھنے کےلئے دوسری ریاست لے جایا جاتا ہے۔
گورنر سے ملاقات کیلئے گئے وفد کی قیادت پی آئی بی حیدرآباد کی ایڈیشنل ڈائریکٹر جنرل ‘ شروتی پاٹل اور پی آئی بی سرینگر کے ڈپٹی ڈائریکٹر ‘طارق راتھر نے کی۔
جموں کشمیر صحافیوں کے وفد نے اب تک انڈین نیشنل سنٹر فار اوشن انفارمیشن سرو( انکوئس)نیشنل انسٹچوٹ آف نیوٹریشن( این آئی این) کا دورہ کیا ہے جبکہ وفد کل نیشنل سکل ٹریننگ انسٹی ٹیوٹ کے دورے پر جائےگا ۔
ان قومی اداروں کے دورے کے دوران وفد مختلف سرکاری اسکیموں سے مستفید ہونے والوں سے بات چیت شامل کرتا ہے ۔