کشتواڑ کے ملوار وارون میں پوری بستی آگ کی لپیٹ میں زائد از۸۰ رہائشی مکان خاکستر

جموں//
جموںکشمیر کے کشتواڑ ضلع کے گنجان آبادی والے علاقے ملوار وارن میں آگ کی ایک واردات میں زائد از۸۰رہائشی مکان خاکستر ہوگئے۔
حکام کے مطابق پر خطر پہاڑی راستوں کے باعث فائر اینڈ ایمرجنسی عملے کو جائے وقوع تک پہنچنے میں وقت لگا۔
اطلاعات کے مطابق پیر کی دوپہر ضلع کشتواڑ کے تحصیل صدر مقام سے۲۰۰سو کلومیٹر کی دوری پر واقع ملوار وارون بستی سے آگ نمودار ہوئی جس نے آناً فاناً پوری بستی کو اپنی لپیٹ میں لے لیا۔
مقامی لوگوں کے مطابق آگ نے پوری بستی کو اپنی لپیٹ میں لے لیا ہے جس وجہ سے درجنوں رہائشی مکان آگ کی لپیٹ میں آچکے ہیں۔
ذرائع کے مطابق زائد از۸۰ رہائشی مکانات خاکستر ہوئے جبکہ ایک جامع مسجد کو بھی نقصان پہنچا ہے۔
فائر اینڈ ایمرجنسی کے ایک سینئر عہدیدار نے یو این آئی اردو کو بتایا کہ کشتواڑ کے ملواروارون بستی سے آگ نمودار ہوئی ہے جس نے متعدد رہائشی مکان کو لپیٹ میں لے لیا۔ انہوں نے کہاکہ چونکہ علاقہ پہاڑی ڈھالان پر واقع ہے لہذا فائر اینڈ ایمرجنسی عملے کو اس علاقے تک پہنچنے میں دشواریاں پیش آرہی ہیں۔
ایس ڈی یم مرواہ ڈاکٹر اشرف نے بتایا کہ کشتواڑ کے ملواروارون بستی میں تین بجے کے قریب آگ نمودار ہوئی جس نے بستی کو اپنی لپیٹ میں لے لیا۔انہوں نے کہاکہ چونکہ علاقہ کافی دشوار ہے جس وجہ سے فائر اینڈ ایمرجنسی عملے کو سخت دشواریوں کا سامنا کرناپڑا۔
ڈاکٹر اشرف کے مطابق سرینگر‘ اننت ناگ اور کوکر ناگ سے کئی فائر ٹینڈر وں کو فوری طورپر جائے موقع کی اور روانہ کیا گا تاہم مرگن ٹاپ میں پھسلن کی وجہ سے انہیں دقتوں کا سامنا کرناپڑا۔
ایس ڈی ایم نے مزید بتایا کہ آگ کی اس واردات میں چار بجے تک زائد از ۴۰رہائشی مکان خاکستر ہوئے ہیں جبکہ آگ کو مزید پھیلنے سے روکنے کی خاطر کئی رہائشی مکانوں کو گرایا جارہا ہے۔انہوں نے مزید بتایا کہ ضلعی ترقیاتی کمشنر نے فوری طورپر پانچ لاکھ روپے متاثرین میں تقسیم کرنے کی ہدایت دی ہے۔
ڈاکٹر اشرف نے مزید بتایا کہ متاثرین کی باز آباد کاری کی خاطر بھی فوری طورپر اقدامات کئے جارہے ہیں۔
دریں اثنا یو این آئی نے اس ضمن میں جب سرینگر میں تعینات فائر اینڈ ایمرجنسی کے ایک عہدیدار سے رابط قائم کیا تو انہوں نے بتایا کہ چونکہ کشتواڑ کا ملواروارون کا علاقہ ضلع سے دو سو کلومیٹر کی دوری پر واقع ہے لہذا وہاں سے فائر اینڈ عملے کا پہنچانا ناممکن ہے۔
ڈاکٹر اشرف نے کہاکہ لارنو کوکرناگ سے یہ علاقہ صرف ۶۵کلومیٹر کی دوری پر واقع ہے اوریہا ں سے ایک گاڑی متاثرہ علاقے پہنچی ہے اور وہاں پر آگ بجھانے کی کارروائی میں مصروف ہے۔ان کا مزید کہنا تھا کہ ڈورو، کوکر ناگ اور لارنو سے تین فائر ٹینڈر، تین کویک رسپانس گاڑیاں بھی کشتواڑ روانہ کی گئی ہے۔
یہ رپورٹ فائل کرنے تک کشتواڑ کے ملوار ون علاقے میں آگ بجھانے کی کارروائی جاری تھی۔